جريدة الأهرام الجديد الكندية 
مقالات مشابهة
كرجل قانون و كل يوم يجيلي عميل في جريمة قتل او شروع او جرح قطعي او طعنة سكين مطبخ الكلام دا مهم جداا للرجالة لتفادي المشاكل الزوجية في الشتاء و البرد و خاصة بعد أكل القلقاس و دهون دكر البط علشان محدش يقول ماقولناش ويزعل)
١- ما تدخلش المطبخ وهي واقفة فيه بتغسل المواعين.. لان ده بيكون زي وقت اكتمال القمر عند المستذئبين كدا .. ممكن تهبرك في ثانية.
٢- الشاي.. حاول تقلل من طلباتك لمشروباتك السخنة لان دا معناه كوبايات كتير وهتقوم تقف على الحوض كذا مرة.. والدراسات الحديثة بتقول ان طول عمرك بيتناسب عكسيا مع عدد مرات وقوف مراتك على الحوض في الشتا.. قلل وقفتها.. تعيش اكتر
٣- ماتحاولش تتريق على الاستريتش اللى تحت البنطلون اللى فوق البنطلون التالت اللى تحت البيجامة اللى فوق البروڤر اللى تحت الروب اللى تحت الشال اللى حاضن الدفاية الحاجات دي هي الضمانة الوحيدة انها ماتتتعبش وقت الامتحانات والمذاكرة … بتاعة العيال اللى لوسابتهم لك هتشنق نفسك بكوفية في جنش نجفة طرقة البيت
٤- الجزمة القديمة… “لا مش قصدي على اللي نصحك تتجوز” قصدي اللي لابسها في رجلك.. تقلعها اول ما تدخل من باب العمارة احتياطي .. مش باب الشقة .. لانك لو وسخت الارض اللي لسه ممسوحة بطين المطر اللي في جزمتك من الشارع اعتبر نفسك من المختفين قصريا لحد رمضان..
5- ابعد عنها لمدة ٣ ساعات بعد نشرها للغسيل في الشتا.. لان تعرضها لتيارات الهوا البارد وقت النشر مع غسيل المواعين مع مذاكرة العيال بيخلق حالة من الهلاوس البصرية بتخليها شايفاك بطانية تايجر متربه ونفسها تنفضها بالمنفضة او بالسكينة ايهما اقرب..
6ـ التليفزيون.. احد اكبر العوامل اللي ممكن تنجيك من فترة الشتا وانت مع مراتك… الريموت في ايدها ما تفكرش تيجي جنبه.. هتتهور وتاخده وتجيب ماتش كورة.. مش هتلاقي لعيب واحد يحضر جنازتك.. كلهم في المنتخب
٧- حاول تبقى منتبه وانت نايم بالليل..هتقولي ازاي بقى؟هقولك مااعرفش المهم تبقى واعي انك ماتشدش اي بطانية من الستة اللى هي مستغطية بيهم او توقع اي لحاف من اللى بين البطاطين لان دا معناه تغيير في درجة حرارة جسمها وممكن يحصل خروج من حالة الثبات وتبقى مجزرة..
بص ماتتكلمش خالص ف الشتاء أحسنلك cpd
