جريدة الأهرام الجديد الكندية 
مقالات مشابهة
نازك شوقى
أثار انتحار موظف في شركة تيلي بيرفورمانس مصر الشركة ” الدولية التى تعمل في مجال ” كول سنتر ردود أفعال واسعة حيث نشرت فتاة تدعى روشان بغدادي مقطع فيديو به تفاصيل الانتحار
وقالت روشان عبر صفحتها : في حاجة حصلت ولازم العالم كله يعرف اللي حصل، من يومين واحد في الشركة نط من الدور الثالث عشان ينتحر، ونط ومات في ساعتها.
وأضافت وهي تبكي: أنا كنت واقفة جنبه وهو بياخد آخر نفسه في المكان، أنا لحد دلوقتي مش عارفة أقوم من السرير ولا أدخل المكان تاني، متابعة: يا جماعة أنت كتيم ليدر أو مدير حط نفسك مكان أي حد، أنت مسؤول، لازم تحسوا بالناس اللي تحت إيديكم.
وواصلت بغدادي: أنت الموظف بيقضي معاك وقت أكتر ما بيقضي في بيته، بتعاملوا الناس على إنه عبيد، إحنا مش عبيد، زي ما أنت عاوزه يتعامل مع الزبائن وبتعاطف معاهم، أنت كمان لازم تشوف مشاكله فين وتتعاطف معاه.
وأكدت قائلة: الراجل كان واقف جنبي وهو بيموت، بتاع الأمن بقوله ربنا يرحمه قالي الله وأعلم، أنت مين عشان تقول مين ربنا يرحمه ومين ربنا ميرحموش. عواطف الناس مش لعبة
وشددت: عواطف الناس مش لعبة في إيديكم، الولد نزل الشغل مرجعش لأهله، كل ده عشان تحقق أرقامك، وتكون أحسن مدير.
وأشارت إلى أن المدير لا بد أن يقف بجانب موظفيه، ويضيف إليهم دائمًا، متابعة: ربنا هيسألكم عن الأرواح اللي بتروح بيتها كل يوم مكتئبة، عشان فاكرين إنك مدير ناجح، عمرك ما هتكون مدير ناجح والناس بتروح بتعيط من تعسفك وجهلك ومرضك.
وأكدت أن الشركة لم تنشر نعيا للموظف، وقالت: حسبي الله ونعم الوكيل، لا حول ولا قوة إلا بالله العظيم، وصلنا إننا حتى مش عاوزين ننعي الراجل.
وأردفت قائلة: أنا بلوم نفسي إني ملقنتوش الشهادة، يا ريت مصر كلها تترحم عليه، الناس دي هتتحمل المسؤولة قدام ربنا.
وواصلت بغدادي: مش هتكون مدير شاطر وأنت بتدوس على الناس، اوعوا تستهونوا بمرض الاكتئاب، اللي بيهزر ويضحك معاك بيروح ياخد دواء عشان بس ينام.
