بقلم : رحاب صبرى
بلاش تبص على نص الكوباية الفاضى ركز فى نص الكوبايه المليان
كان اول مره اسمع الجمله دي وانا فى اعدادى وساعتها طبعا كنت محتاجه حد يترجمهالى بالرغم انها بالعربى لكن مكنتش فهماها
ولما فهمت انها تشبه لجملة خليك ايجابى فضل لغز محيرنى
فين الكوبايه ؟ واية علاقة الكوبايه بالايجابيه ؟ طب ايه علاقة الايجابيه بالنص المليان ؟
اللغز ده زيه زى اى شئ ف حياتنا بياخد فتره يشغل بالنا وفتره ننساه
ولما كبرت شويه اتقالت الجمله تانى قدامى وده خلانى افكر تانى فى اللغز
فين الكوباية ؟ واية علاقة الكوبايه بالايجابيه ؟ طب ايه علاقة الايجابيه بالنص المليان ؟
فقولت اقعد مع نفسى وافكر من هنا شويه ومن هنا شويه
وصلت الى ان الكوبايه هى الشخص ،الكوبايه هي انا ، ايوه انا
انا اللى ااقدر اشوف فى حياتى الجزء الحلو المنور فى اوقات ، وانا بردوا اللى ااقدر اشوف فى حياتى الجزء المر المظلم
اوقات كتير الواحد بيمر بأزمات واذا ركزنا كويس مهما كنا بنتكلم مع اصدقاء مقربين لينا وبنحاول نوصف الهم اللى جوانا ،ومهما حاولنا نمشى على النصايح اللى بنسمعها من ناس يمكن يكونوا مروا بنفس التجربه ، لكن محدش بيقدر ينقذ نفسه من غير الكوبايه
محدش بيقدر ينقذ نفسه غير نفسه ، انت الشخص الوحيد اللى قادر تغير من مزاجك من مر لحلو وانت برضوا الوحيد اللى قادر تكون شخص ناجح او شخص فاشل
واذا فكرنا بشكل اكبر انت بردوا اللى تقدر تغير الكون …..ايوه …. تقدر تغير الكون لانك انت اساس الكون
كل واحد مننا هو جزء من مجتمع،بنتولد فى مجتمع صغير “الاسره” وبعد كدا المدرسه ثم …ثم… الا ان نصل الى المجتمع الكبير “الوطن” اللى من اول ما بنتولد ونبدء نكبر بيتولد حب الوطن جوانا
وقد ايه كل كوبايه فينا اقصد كل شخص فينا عارف قد ايه فى مشاكل كتير فى وطنا يمكن لما بنتكلم عن المشاكل دى بنحس بتفريغ لطاقه سلبيه جوانا لكن اذا فكرنا كويس هنلاقى ان مفيش حاجه بتتغير ولا حاجه بتتصلح بالكلام
لكن اذا بصينا لنص المليان اللى جوانا الاول ، النص الحلو اللى فى كل واحد فينا ،الحاجات الحلوه اللى كل واحد مننا بيتميز بيها ، اذا فكرنا ان كل واحد يكبر النص المليان اللى جواه ويحاول يصلح عيوبه عشان يكون النص المليان اكبر من النص الفاضى ،عشان تكون سفير للايجابيه فى المجتمع الصغير اللى هى نواة المجتمع الكبير ،كل شخص اذا بدء بنفسه …..بأهله ….اصدقائه اكيد فى حاجه هتتغير
يمكن لما نبدء نغير حاجه جوانا نكون حافز لشخص بيمر بتجربه سيئه ومش قادر ياخد قرار انه يساعد نفسه ، حاول تكون علامه او شخص مبتسم ودى ابسط الامور اللى بتنعكس على الاخرين بشكل كويس جدا
اذا كل واحد فكر فى نصه المليان هيلاقى حاجات كتير حلوه مر عليها الزمن ونسيها فى زحمة الشغل وتلاهى الدنيا لكن صدقونى الحاجات الحلوه اللى جواه كل واحد فينا تستاهل اننا نتعب عشانها شويه عشان ترجع تكون ظاهره علينا فى التعامل مع الناس عشان كل مانكون احسن كل ما مجتمعنا ووطنا هيكون احسن
ده كل اللى دار فى بالى على فين الكوبايه او ايه هى الكوبايه
لكن بصراحه معرفتش ايه علاقة الكوبايه بالايجابيه ؟ ساعدنى عزيزى القارئ اذا عندك معلومه وطلع الحاجه الحلوه
![](https://www.ahram-canada.com/wp-content/uploads/2015/09/رحاب-320x330.jpg)
رحاب صبرى