كتبت .. رشا خالد
حوار خيالي بين شاب من اهل الدنيا ، و شاب من اهل الأخرة!!
دنيا : أزيك يا صاحبي ، وحشتني !!
أخره : الحمد لله ، و انت كمان !!
دنيا : يا بختك أرتحت أوي ، الدنيا بقت صعبه جدا ، انا بحسدك !!
أخره : صعبه ؟ انت شايف كده ؟ شايف اللي انا فيه راحة ؟؟!
دنيا : أه طبعا ، الواحد مطحون ، و مش مرتاح ، و الهم راكبه علي طول !
أخره : هم ايه اللي راكبك ، و الله ما انت فاهم حاجة ، كنت بقول زيك و يارتني أرجع و أعيش كل الهموم بس أرجع ، انا اللي بحسدك !!
دنيا : يااا للدرجه دي ، طب ليه بتقول كده ، ده انا فاكرك مرتاح !!
أخره : عارف يا صاحبي انا كنت ، انا كنت شايف الدنيا ديه غلط اوي ، كنت ناسي حاجة اسمها موت ، موت يعني هتقابل ربك ، مش موت يعني ترتاح ، مش قادر اوصفلك لما فجأه كنت قاعد و مكنتش تعبان و ﻻ بشتكي من اي حاجة ، و فجأه ظهر قدامي ملايكة ، و جسمي عامل زي اللي اتخدر ، مش عارف اعمل حاجة ، و ملك الموت وقف عند راسي ، كنت عايز اقوله أديني خمس دقايق بس أصلي ركعتين توبه لربنا عن اي غلطه ، بس خلاص كان فات الأوان ، شفت روحي طالعة قدام عنيا ، مش عارف أمسكها ، وﻻ عارف أقولها أرجعي هتروحي تقولي لربك ايه !! (بيبكي)
دنيا : طب و قبرك !!
أخره : يااااااااااااااااااه متفكرنيش ، اول لما كلوكوا سبتوني و مشيتوا كنت سامعكوا و انتم ماشيين ، كنت عايز أقولكوا ، أصبروا متسبونيش لوحدي ، بس مكنتش قادر انادي ، فجأه ظهرلي ملكين مهما حكتلك شكلهم عامل ازاي مرعبين اوي ، قوموني ، و بدأو ف سؤالي ، اسئلتهم مفيش اسهل منها ، بس مش اي حد يجاوب عليها !!
دنيا : طب قولي أيه اكتر حاجة ندمان عليها !!
أخره : (بكاء شديد) ، أول حاجة ندمان عليها الصلاة ، ندمان علي كل فرض فات مني اوي ، كنت بكسل كتير و أطنش و النوم واخد نص يومي ، أزاي مكنتش بصلي ؟ أزاي مكنتش بقابله ؟ محدش بقالي غيره والله ، هو كان بينادي عليا كل يوم خمس مرات و انا وﻻ فارق عندي ، انا مش عارف يوم القيامة هقولوا ايه ، أصحابي اللي كانوا بيخلوني مصليش راحوا فين دلوقتي ، نسيوني و مش نفعني بحاجة ، الدنيا اللي كانت بتأخدني اوي و تشغلني ساعة الصلاة ، راحت فين ؟ راحت لغيري و رمتني في التراب ، ندمان اوي علي اني لما ناداني مقولتش حاضر يارب !!
دنيا : طب و القرآن احكيلي عامل معاك ايه في القبر ؟!
أخره : ببكاء شديد #القرآن…..كان اخر اهتمامتي ، كان ايه اللي هيحصلي لو كنت قرأت كل يوم فيه صفحه واحده ، كانت فين دماغي ؟! انا بشوف ناس معايا هنا ، القرآن مونسهم ف القبر أحلي ونس ، و أنا قاعد في وحشة القبر لوحدي ، و انت مش عارف يعني ايه وحشة قبر !!
دنيا : طب و القيام و الصدقات و العمال ديه كنت بتعملهم ؟!
اخره : القيام ، ياه انا بعض الارض ندم ان ربنا كان بيبقي ف السما الدنيا و مكنتش بصلي حتي ركعتين ينورولي قبري ، مكنتش برفع ايدي ادعيه ، في ناس معايا قبورهم نورها مش هيجي ف بالك و كل ده علشان كانوا بيقوموا في الضلمة يصلوا ، و الصيام و الصدقات ، كنت ل الأسف بضحك علي اهلها ، بقول مضيعين دنيتهم و فلوسهم علي أيه ، طلعوا أذكي مني ، بيحوشوا ليوم فيه بتفرق ، أنا اللي ضعت يا صاحبي و الله أنا اللي ضعت!!
دنيا : أنصحني طيب !!
أخره : أوعي تغرك الدنيا ، أوعي تفتكرها دايمة ، انا روحت في غمضة عين ، خليك مع ربنا متعملش زيي ، و الله هو بيحبك اوي لكن احنا فاكرين الدنيا بتحبنا أكتر ، خليك حريص علي الحسنة ، متكسلش عن طاعه ، والله اللي انت بتضيع نفسك علشانهم زايلين و مش نافعينك ، و الله ما حد باقيلك غير ربك ، قرب منه ، الدنيا ﻻ تسوي جناح بعوضه والله ، خلي يوم موتك لقاء شوق مش لقاء خوف ، قدامك لسه تصلح ، لكن انا خﻻص راحت عليا ، فهمت ليه انا اللي بحسدك
![](https://www.ahram-canada.com/wp-content/uploads/2021/11/1550-651x330.jpg)
رشا خالد