جريدة الأهرام الجديد الكندية 
مقالات مشابهة
بقلم .. ميلاد ثابت إسكندر فنان تشكيلي
كل يوم أقوم م النوم الساعة سـابعَة
قايم مَفزوع طول الأسبوع إلا الجُمعَة
ألبِـس قَميصـي وبنطلـونـي
والنوم ماراحش من عيوني
أنزل علي طول، أجري مَسطول، من غير فطار
زَحمَــة وظـيـطَـة، وخَلطَبيطـة، والجـو نار
أصل النهاردَة من غير مؤاخذَة، سـوق الخُضــار
توكتوك يمين، توكتوك شمـال، ومافيش نظــام
سامع صريخ، بَـيَّـاع فسيخ، وأنا نفسي أناااام
وعَم بُرَعي حَدَف الزبالة، لِبست في وشي وحالتي حالة
لسه بقولُه فَـتَّـح يا ذوق… مِسـك الساطور وقالـي فـوق
طبعاً مِـشيت وفُـقـت فعـلاً … ده يقـدَّر يعَـلقـنـي كعِجـلاً
ده العُمـر يا با مـش بَعـزَأه … في عنيــه شَــرار ومبــارأه
ووصلت للمَـوقَف ووقـفت. ولا فيه مواصلَــة ولا أي زفـت
والوقت مِني عَمَّال بيجري..و لازم أمضي حضوري بَدري
ومن بعيـد ظَهرت عَـرَبـيَّــة، صنـدوق حَـديـد ومـصَّـديَّــــة
وعشان تلحَـق فيهــا مكـان.. لازم تكون بُرَعــي وطرَزان
ودخلت وأنا مخنوق مُنهــار.. جَرحنـي واحــد بالمُنشــار
ماعليش أصله نجار مسَلَّح…طفل ومن طفولتُه مشَّـلَّح
ووصلت أنا للشُغـل مأخـر، وموظَـف الدَفتَر بيشَّخَر
اصحَي يا عَم الله يخليك،،، عايز أمضي أبوس إديك
قالي خلاص الوقت راح،، فُكَك مِني وسيبني أرتاح
وراح مكمِـل نومُه البيه… رُحـت مطَّـلَّـع غِلـي عَليه
كل يوم تَقفيل تَقفيل، قـوم يا فشِلَّـه يا كرش الفيل
كلمَـة مِني وكلمَـة منُـه،، والناس زَي النَمـل أتلَمـو
إللي بيهَـدي وإللي بيحّـوَّر،، وإللي بمـوبايلُـه بيصَوَّر
والأخت الغالية عطيات ،، نازله صريخ وصوات وعياط
والمُـدير الباشـــا العـام.. ساب مكـانـُه وجـالنـا أوام
وكل شيء فوق راسي إتهَد، أكيد هيرفدوني بجَد
فجـأة ورَن بصوتُـه المُزعِـج ،، أصلُه منَبَـه دايمـاً مُــرعِــب
وفضلت أضحَـك بأعلي صوت، طبعاً ما أنا فرحان مبسوط
قررت أني أكمــل نومــي… يـوم غيــاب ولا يرفــدونــــي
خخخخ
