ريش الجونة طار

مقالات مشابهة

علام تتنازعون

‏أسبوعين مضت

الهدم يبدأ من التعليم ..الجريمة الوقحة

‏3 أسابيع مضت

نصف الحق يعثر الكثيرين

‏3 أسابيع مضت

بقلم : ماجدة سيدهم

ريش الجونة طار وبقا المهرجان عريان تماما ..من غير “ريش ” عريان من الحقيقة ..عريان من عدم الثقة بالنفس .عريان من الفن و الإبداع لأنه كشف عن أزمة كبيرةجدا بين الفن وبين سطحية من يدعون الفن

.* فيلم “ريش ” اللي عمل موجة الغضب والانسحاب من بعض الممثلين بتوع (متلازمة الجونة ) أثناء عرضه و اللي فاز باقتدار في مهرجان ” كان” السينمائي كأول فيلم روائي مصري بوجه مصري جديد ولأول مرة واللي شرف مصر والسبنما المصرية الفيلم دا كان بمثابة الصفعة الصادمة في مواجهة هوجة الجونة ليكشف عن كم الزيف والادعاء والتعالي والهشاشة النفسية والفنية لكثيرين يمتهنون التمثيلوالسبب من وجة نظرهم أن “ريش” فيلم مسيء لسمعة مصر لأنه ومن خلال فكرته المختلفة والجديدة صور حقيقة واقع مرير بيعيشه قطاع ضخم بالمحروسة ودا من وجهة نظرهم لايليق بالجمهورية الجديدة ..!

طيب شوية حاجات كدا : أولا .شكرا لأن انسحابكم لفت الانتباه أكتر للفيلم وحقق أكبر دعاية للي ماشفهوش وحول الاهتمام من الأزياء لمشاهدة و لمعرفة أكتر عن الفيلم ..

* ثانيا .. كنتوا فين من ٤ شهور لما فاز “ريش” بجايزة عالمية كبيرة ..المفروض أنها تهمكوا .. لاسمعنا لكوا تعليق ولا نقد حتى ولا شوفنا غيرتكوا على سمعة مصر ولا كلفتوا خاطركوا حتى تشوفوا إيه حكاية الفيلم المصري دا للمخرج عمرالزهيري واللي عمل الضجة دي كلها …لكن لما تكون دي أول مرة تشوفوا الفيلم وتنسحبوا بالشكل دا فدا لأنكم منسحبين من زمان .. وكدا المسألة شخصية مش قصة غيره على مصر ..

*افلام خالد يوسف ومخرجين غيره طرحوا قضايا من قاع المجتمع بكل أوجاعه ..رائعة جدا.. واضافت للسينما المصرية ..انتو فين بقا من الفن ومن سمعة مصر ..

*المسيء لمصر ياسادة هو تصنيفها بحالات التحرش والاغتصاب والانتهاكات ضد النساء والاطفال وانهيار التعليم والقيم والذوق العام ..

* المسيء لمصر ارتفاع معدلات الطلاق والجريمة والإنتحار وحوادث الطرق ..

*المسيء لمصر في تدمير شبابها بالفكر الجهادي وتشتيت طاقاتهم وأحلامهم مابين الحيرة والجهل والبطالة والخوف وعن قصد ..

* المسيء لمصر أنه رغم الجمهورية الجديدة لكن تأثير الفتوى أقوى .. وسهل جدا ترتبك الجمهورية دي لو بنت لبست فستان ..

* المسيء لمصر إنهيار كل فنونها وآدابها وترجماتها وموسيقاتها لصالح الفكر الرجعي ..

*سمعة مصر لما ينسحب فنانيها حتى لو مدعين من متابعة فيلم حاز على جايزة عالمية لمجرد احساسهم بالفشل في الحصول علي مثلها. طوال تاريخهم السطحي .

* سمعة مصر لما ينسحب فنانيها حتى لو مدعين من واقع مؤكد للمجتمع المجهد والمثقل بأعباء مهولة ثم ينكر القهر والفقر والقسوة اللي بيعانيها جمهور كبير لمجرد أنه عزل نفسه في برجه العاجي ..

* سمعة مصر مش مجرد سجادة حمرا ( عقدة الريد كاربت وعاوزين نبقى زي الغرب ) وصدقتوا بكدا بقيتوا عالميين ..انتو فين من قضايا المجتمع وهمومه ومشاكله التقيلة ..

*الفنان الحقيفي لاينسحب خاصة بدون مبرر يستحق ..

* أما اللي هايسيء لسمعة مصر بجد ويعتبر فضيحة فعلا هو لو فلحت حملتكم وهجومكم ضد “ريش ” لمجرد امتلاككم النفوذ والتأثير ..

* في الأخير لو فكرتوا تكونوا فنانين بجد انزلوا لكواليس مصر .. وقتها هاتعرفوا ليه فيلم “ريش ” فاز بجائزة مهرجان “كان “

* واضح جدا الشارع المصري رغم كل تعبه لكنه بيعرف يميز كويس أوي بين الحقيقي والمدعي ..*مبروك فيلم”ريش”..