جريدة الأهرام الجديد الكندية مقالات مشابهة
بقلم : ماجدة سيدهم
سؤال لأي مكبوت مش على بعضه
لو ماشي في الشارع بأي مكان وشوفت بنت خواجاية بشورت وحمالات وجنبها مصرية تعيسة بعباية وحجاب. انت كجبان وقذر حاتتحرش وتغتصب مين .؟ طبعا مافيش غير المتعوسة اللي حاتقدر عليها وملهاش أي حق كمان لانك لو فكرت تقرب الناحية التانية ..البلد كلها حاتجيبك من قفاك ..وتبقى حكاية ..بلدها هاتجيب لها حقها من حباب عينك وعين اللي يتشدد لك .
عرفتي ياست البنات أن العيب مش ف لبسك ..عرفتي أن سكوتك وخوفك خلوكي عرضه لأنجس وأتفه خلق الله ..
.عرفتي لما صدقتي أنك عورة وناقصة وأنك شيطان وغواية وكلك على بعضك كدا مجرد فرج للشهوة دا خلاكي رخيصة ومبتدلة ومباحة حتى من وأنتي في اللفة .. وبقيتي قرفانة من نفسك وكارهة حياتك
صدقتي أن نظرتك لنفسك هي اللي وصلتك للمهانة دي .. فوقي ماتخافيش ..افضحيهم ..شجاعتك وثقتك بنفسك بترعبهم
يادولة .. ياحضرة المسؤول ..أبوس ايديكم بنات مصر بقوا أرخص مما تتخيلوا ..كل بنات العالم عايشين من غير خوف اشمعنى احنا اللي محروق دمنا ومنتهكين للدرجة دي ..
القانون فوق فوران الهرمونات
