جريدة الأهرام الجديد الكندية 
مقالات مشابهة
حادثة جون الشاب السوداني و اللي اتعاطف معاه كتير من الناس ع الفيسبوك بسبب ( التنمر و العنصرية ) أنا شايفها حادثة عادية جدا و طبيعية جدا و أقل حاجة عندنا و بلاش كم المثالية و الإنسانية الغير متوافق أبدا مع طبيعة شعبنا.
احنا شعب مش بس عنصري و طبقي و متنمر ضد الأجانب.
لا حضرتك احنا أساسا شعب كله عنصري ضد بعضه و طبقي من الطراز الأول و متنمر علي نفسه.
احنا الشعب الوحيد اللي بيقول فلان ده ( ابن ناس ) و فلان ده ( فلاح ) و سيبك منه دا ( عربجي ) و عارف الواد المسيحي و البنت السمرا و حتي المرضي يا مؤمن لم يأمنوا من تنمرنا و طبقيتنا لدرجة مرضي متلازمة داون بنقول عليهم المعتوهين و مريض التوحد ( عبيط ) و مرضي الصرع ( مجانين ).
و حتي الناس اللي عندهم Cretinism خلل في الغدة الدرقية بتسبب لهم تقزم بنقول عليه ( عبيط ) إحنا اللي سبنا موهبة أحمد زكي العبقرية و أطلقنا عليه ( الفتي الأسمر ) كنوع من التكريم و لما كنا بنحب نشتم شيكابالا
( اللاعب الموهوب ) كنا بنشتمه بلونه.
احنا الشعب اللي بيقول ( واحد صعيدي ) في بداية كل نكته و الصعايدة شايفين سكان القاهرة عيل نايتي و فافي
و تافهين و أولاد القاهرة شايفين الصعايدة مابيفهموش.
احنا الشعب الوحيد اللي بيقول ( انت نسيت نفسك ولا إيه ) و ( إنت ماتعرفش إنت بتكلم مين؟ )
و( الله يرحم أبوك كان……. ) السيساوية شايفين الإخوان ( خرفان ) والإخوان شايفين السيساوية بهايم.
يا راجل دا إحنا لما بنحب ننصف المرأة في خناقة بنقول ( خلاص يا عم دي واحدة ست ) و لما بنحب نتعاطف مع مريض نفسي بنقول ( معلش دا عبيط ) و لما بنحب نعبر عن تكاتف الشعب المصري بنقول ( عنصري الأمة ) !!!!
إحنا الشعب اللي حتي دور العبادة فيه بتصنف الناس لدرجة أن المقاعد الأولي دايما محجوزة ( لصفوة المجتمع ) رغم ان تعبير ( صفوة المجتمع ) تعبير طبقي بإمتياز بس مش مهم.
احنا الشعب الوحيد اللي بيستعمل بعض المهن المحترمة كشتيمة ( فلان ده فلاح ) و ( علان ده عربجي ) و كفتجي و طعمجي و طواب و بواب و خدام.
ابن المدينة شايف اللي جاي من الأرياف جاي من ورا الجاموسة وابن الأرياف شايف ابن المدينة مستهتر و طايش و فلاتي.
المسلمين شايفين أنهم ( الأعلون ) و المسيحيين تأكدوا أنهم ( المُضطُّهدون ) و كل واحد من الطرفين متأكد أنه هو بس اللي معاه مفتاح الجنة و كل دين قسم نفسه طوائف وكل طايفة شايفة نفسها علي حق و الباقي على باطل.
احنا الشعب الوحيد اللي إدي ألقاب عظمة لرجال الدين مسلمين ومسيحيين( فضيلة ، قداسة ، سيدنا و مولانا )
و دايما الأغنياء بيخافوا من الفقراء و الفقراء شايفين أن كل الأثرياء حرامية و لصوص والأبيض مش عاجبه القمحي والخمرية بتتنمر علي اللي بشرتها سودا.
احنا الشعب الوحيد اللي التنمر عنده أسلوب حياة و العنصرية دين و الطبقية حق و التنوع الطائفي بدع و هرطقات !!!
