جريدة الأهرام الجديد الكندية 
مقالات مشابهة
بقلم / ماجدة سيدهم
ماتزعلوش لو ماقدرتوش تحضروا أسبوع الآلام في الكنائس المغلقة بسبب الكوڤيد فيه كنايس تانية كتير وأهم ومفتوحة 24ساعة رغم الكوفيد برضه.
كنيسة المقهورين واللي بيتعرضوا للعنف الأسري والخوف واللي متبهدلين في بيوتهم بإختلاف الأسباب ..
كنيسة الناس اللي اتظلمت بقصد وخسروا كتير وعلشان مالهموش حد يدافع عنهم اكتفوا بالانكسار والعزلة رغم أن همه اللي غالبا بيسألوا عليك ..
كنيسة الاطفال والصبية اللي بالملاجيء وأطفال الشوارع.. وما ادراكوا باللي بيحصل لهم من انتهاك بدني واستغلال جنسي وتدمير نفسي مؤكد ..
كنيسة كبار السن اللي عزة النفس خلت عيونهم تضحك وجواها دمعة وتوسل يوجع أي قلب ..دمعة مش عاوزة اكتر من طبطبة أو تقضي ليهم طلب مع ضعف حركتهم وعجزهم
كنيسة الشباب اللي بيعافر ومش عارف سكته .. واختذلت أحلامهم ..وخذلهم أصدقاء أو أحباء كتير ..
كنيسة أي حد طلب منك أنك تصلي ليه وكالعادة تقول له جملتك المشهورة “صلوات القديسين “. وتريح ضميرك
الكنيسة المرفوضة.. بس عيوب خلقية أو قلة النظافة أو أمراض مزمنة أو ملامح مش جميلة أو مستوى اجتماعي وسكني معدم ..حسسهم أنهم مقبولين ومرغوب فيهم وان طاقاتهم ومشاركتهم تفرق جدا ..
الكنيسة العريانة من سد الاحتياجات الأساسية وستر الأسرار ويادوب بس محتاجين حد يغطيهم ويحسسهم بالكرامة ..
كل الكنايس دي وأكثر في زمن الكورونا محتاجة ترفع التليفون وتسأل بقلب واهتمام عنهم ..تشجعهم وتسر قلبهم وممكن تدعم ماديا لو متاح ..
لو مش قادر تقدم للكنايس دي أي شيء ملموس ..على الأقل تقدر ترفع التليفون وتسأل عن الناس دول وتحسسهم أنك انت اللي محتاج لهم وكلامهم مشجع ليك جدا ..حسسهم بالأهمية وإنك في كل مرة بتحتاج تستفيد منهم حتى لو وصفة أكل هي معروفة ليك ..
شاركهم مناسباتهم ..لما تشوف لبس عليهم بسيط قول عليه حلو أوي ..ولايق عليهم وهايكل منهم حته ومش عيب تسأل أنك عاوز تشتري زيه ليك أو لابنك .
لو مش قادر تعمل أي حاجة من دول ..لكن ممكن جدا تكتب في نوتة اسم أي حد جه ببالك وتصلي له في كنيسة مخدعك ..
كل يوم هتلاقي نفسك بتضيف للنوتة أسماء جديدة .. وهاتبدأ تفتكر حد من الذاكرة من زمان أوي …تستغرب ايه اللي فكرك بيه .. دا في حد ذاته رسالة ليك أنك تصلي علشانه وأنت ماتعرفش عن ظروفه شيء.. بس أكيد هو محتاج لحد يصلي علشانه ويرفعه أدام ربنا ..انت بقى الحد دا .. أنك تحطه بظروفه أدام ربنا وهو هيعرف يتصرف ..دا مش كافي إنك تفرح للإمتياز دا ..
جرب وكل يوم هتلاقي الأسماء بتزيد ..والصلاة بتكون هنا مسؤوليه فعلا ..الصلوات المحفوظة ربنا حافظها قبل مننا ..لكن هو عاوز ناس كتير متألمة نحطهم أدامه ..
تقدروا تحطوا اقتراحتكوا علشان نفتش عن كنايس كتير أدامنا ومفتوحة رغم قسوة الظروف الحالية. ..
كنيسة مخدعك مفتوحة وأهم ..
ربنا يفرح قلبك ويعوض تعبك كل سنه وحضرتك طيبة
حقيقي مقال في السليم ويصحصح القلب