جريدة الأهرام الجديد الكندية مقالات مشابهة
بقلم / ماجدة سيدهم
أوعي ..تقرب من الموجوع أوي أو المهزوم أوي والمطعون أوي أوي واللي اتكسر بجد واللي اتظلم واتقهر بجد ..وتقوله لازم تسامح وتحب وتعذر لأن ربنا قال كدا …أو أن دا اختبار للصبر والاحتمال ومكافأتك عند ربنا عظيمة أو تقوله أنت ماتعرفش الخير فين دا اسمه قهر وتجاهل ..
أوعى تروح للمخذول واللي عايش جوه وحدته وأنت مبتهج وسعيد وتستكر عليه الحزن وتستغرب من كسرة نفسه وإحباطه .. وتقوله أجمد كدا و أوعى تبكي أو لازم تنسي أو لازم تقاوم او استغفر ربك أو لازم تروح الكنيسة و تفرح وتهلل وتسبح معانا وأن وطننا في السما .. دا اسمه قهر وحماقة ..
وأوعى أدامه تسرد مواعظ عن فوائد الصلاة والاعتراف والتوبة كأن اللي هو فيه عقاب بالمرصاد عن ذنب أوتضغط عليه باللوم وكان لازم يبقى حريص اكتر ..أو تقوله احمد ربنا أنت أحسن من غيرك. .. أو شوف فلان وعلان ..أو شوف القديس فلان اتحمل كذا وكذا .. . وتفضل تحكي عن سعادتك والمعجزات اللي بتحصل كل يوم معاك لمجرد انك خير من يصلي و يواظب وبيتشفع .. أو أنك المؤمن الواو الواثق في الله ..دا اسمه قهر وغباء
أوعى تتعامل مع صدمة اللي فقد غالي بأن دا الكاس الداير وكلنا هنموت.. ويابخته دا موتته حلوة .أو هيروح مكان أحسن .. أو سابكوا مستورين .. دا قهر وكبرياء.
للأسف دا بيكون رد فعل اغلب الناس اللطيفة بزيادة اللي ماختبرتش أي ألم اطلاقا .. صدقوني مافيش أسهل من رص الأيات والجمل الرنانة .. يعني تقضية واجب والسلام .الكلام شيء والاحساس شيء تاني خالص ..
الموجوع مش محتاج يسمع كلام من حد ولا أمثلة ولا حكم .. بيحتاج بس ناس حواليه ..دا بيطمنه وبيرفع عنه غم وحشة كبيرة .. فيكفي أنك تكون جنبه بس ..تحضنه من قلبك بجد .. تطبطب على كتفه كل شوية .. تبوس راسه وكأنك بعتذر له عن الدنيا كلها ..يحس بالحب والاهتمام بجد .. دا أفضل جدا من أي كلام .. وسيبه يعبر عن حزنه وغضبه بطريقته ..ياخد وقته لحتى يتوزان .. سيبه يحكي ويكرر نفس الكلام .. دا أبسط حق للمجروح
فرجاء أوعى تتجاهل أو تستهتر أو تستخف بمشاعر الوجع والمرارة لأي حد ..
.مش عارف تدعمه فالسكات أفضل جدا ..
رفقا بالمجروحين ..
