جريدة الأهرام الجديد الكندية مقالات مشابهة
بقلم / ماجدة سيدهم
هو بجد انتو زعلانين وواخدين على خاطركوا من الستات الوحشين دول اللي أكلو تورتة الأعضاء التناسلية العيب
هو بجد انتو صدقتوا نفسكوا بأن دا فيه خدش لحياء الشعب اللي راقد على المصلية ليل نهار واللي نفسيته فلة ودماغه فلتين ..
أولا لازم تعرفوا أن تورتة العضو الذكري دي ماهي إلا رد فعل ساخر على أسوأ وأحط وأسفل وأقسى مرحلة بنعيشها من كدب وغل وادعاء وعدم مروءة وفشل وعنف نتيجة اغتيال كل القيم الإنسانية والأخلاقية والجمالية واستبدالها بفتاوي البداوة من التحريم المرهق وحديثهم المستمر عن الفروج و الأرداف والنهود والحواجب لنون المقهورات …
زعلانين من التورتة ..! طيب ماهو أغلب المعروض في سوق الخضار مصنف جنسيا والناس بتحكيه عادي جدا وبتضحك عليه كمان ..
واجهوا نفسكم وكفاية دفن رؤوسكم في التراب.. دا الميديا كلها والأدمغة كلها محشية بكوارث أخلاقية وفتاوى تفصيلية مخجلة كلها خادشة للحياء..
فوقوا .. الكرباج الديني الطايح لرواد البداوة ولد عنف وتشتت ذهني وتشويه نفسي و اللي بدوره وصلنا لكبت جنسي متقيح والنتيجة على سبيل المثال :
* أب يعري طفلته في عز البرد ادام الناس بالشارع انتقاما من مراته …كبت جنسي
* أم تعذب أطفالها حتى الموت انتقاما من زوجها ..كبت جنسي
*انتشار زنا المحارم وتفاقم الكراهية حتى داخل الأسرة الواحدة ..كبت جنسي
* جرايم قتل أحد الزوجين بوحشية باتفاق مع عشيق آخر… .كبت جنسي
*, ارتفاع معدلات الطلاق والخيانات واختراع أنواع جديدة من الزواج . كبت جنسي ..
*الهجوم والسباب واللعنات على خالعات الحجاب. والفرح المبالغ فيه لأي معتزلة ارتدت الحجاب(فين الحرية الشخصية ) ..كبت جنسي
*الاقبال المبالغ فيه بين السيدات على شراء الملابس اللانچري خاصة فيما بينهم داخل المكاتب بالمصالح الحكومية. ..وكذا إقبال الكثير من الأزواج على مشاهدة الأفلام الجنسية بالرغم من تفاقم المشاكل الزوجية بينهم اللي بتصل لحد الشتائم بأحط الألفاظ والاعتداء المتبادل بالضرب .. دا بعينه كبت جنسي
*المبالغة والاسراف الشديد في تكاليف الزواج والأثاث والزفاف لزيجات أغلبها ينتهي بالطلاق والفضايح ..برضه كبت جنسي..
*فشل بامتياز في العلاقات الجنسية مهما طالت العشرة .. كبت جنسي ..
* انتشار الحسابات المخادعة لاستقطاب والإيقاع بأي فريسة على الفيسبوك ..كبت جنسي
* تفشي السمنة والبدانة خاصة بين الشباب وقلة التركيز ..كبت جنسي
* تحريم تسمية العلاقة الجنسية بفعل الحب باعتبار الحب والعياذ بالله. عيب وحرام وقلة أدب ..كبت جنسي (لان فعل الجنس ببلاش . مجرد افراغ طاقة لكتلة متجهمة لكن فعل الحب بيكلف .. بيكلف أخلاق وأنك تكون إنسان ..)
*انحدار الذوق العام في الشوارع ..كبت جنسي
طيب شوفوا وشوش الناس ولبسهم وطريقه مشيتهم .. شوفوا مستوى الشوارع وأسلوب التعامل المهين في المصالح الخدمية . شوفوا الايحاءات الفجة في النكات والتعبيرات والكتير من الأغاني . شوفوا التعليقات المرعبة على الفيسبوك .. كبت جنسي
الشارع المكبوت جنسيا هو نفسه الشارع المتحرش والمغتصب لكل شيء .دا مش كبت جنسي بس..دا شارع مرعوب ومهزوم من جوه أوي
الكبت الجنسي مش بالضرورة مقاومة عارمة لرغبة جنسية ملحة والاستغفار عنها شكلا ومضمونا بقدر ماهو صورة ذهنية مشوهة عن الجنس والحب والتربية والعلاقات الإنسانية وأحترام النفس والجسد فضلا عن حالة التربص والتخوين المستمر بين الجنسين .. كلها أسستها موروثات وخرافات وجهل ومخاوف وتراث عتيق غير متصالح وغير متحضر وغير أخلاقي ..
ولأن النساء في مجتمعاتنا المصابة بالورع هي أكثر الفئات تضررا وقهرا فهن الأكثر تعبيرا عن الغضب والرفض والسخرية أيضا ..
سيبوا التورتة شوية وانتبهوا لمن هو وراء العنف والتعذيب في الشوارع
حالة الغضب والتقوى المبالغ فيها أوي بسبب تورتة دا هو الكبت الجنسي بعينه .. ودمتم .
