جريدة الأهرام الجديد الكندية 
مقالات مشابهة
بقلم الدكتور سامح أحمد
قبل ما اهاجر امريكا كان عندي صديق والده استاذ في كلية الزراعة جامعة المنوفية متخصص في ابحاث النحل
انا عارف ان مصر متقدمة جدا في المستخرجات العلاجية من النحل ونشرت ابحاث كتير قبل كده في العلاج بالعسل وغذاء ملكات النحل وسم النحل والبيوبروبوليس
علشان كده لقيت من المناسب جدا اشارك معاهم الخبر الطبي الرائع ده وادعوهم يعملوا بحث مصري خالص في الموضوع
الخبر هو اكتشاف مادة جديدة بتعالج خلايا سرطان الثدي الشرسة المقاومة للعلاج المسماه بثلاثية السلبية لمستقبلات الاستروجين والبروجيستيرون وال HER
ودي تمثل ١٠-١٥ ٪ من حالات سرطان الثدي ومالهاش علاج لحد دلوقتي
الاكتشاف خرج من معهد هنري بروكنز للابحاث الطبية في بيرث بغرب استراليا وعملته الدكتورة كلارا ضافي
اكتشفت الدكتورة ضافي ان سم النحل او الڤينوم بتاع النحل اللي بيحبوه في الجلد فيه مادة اسمها melittin او ميليتين
المادة دي بتقتل خلايا سرطان الثدي ثلاثية السلبية في ٦٠ دقيقة بعد خلطها بالسرطان في المعمل
الڤينوم بتاع النحل فيه ميليتين استخرجوه وشافوا ازاي بيقضي على خلايا السرطان الشرسة اللي من النوع ده اللي مش بتسمح للعلاج الكيماوي يدخل جواها لعدم وجود مستقبلات هرمونية على سطحها
ميليتين melittin بيعمل خروم في غشاء البلازما للخلية والخروم دي بيتقتل الخلية لكن بالاضافة لكده مادة ميليتين بتمنع الرسائل الخلوية اللي بتستخدمها خلايا السرطان علشان تعيش وتنقسم
لما اضافوا مادة ميليتين melittin للعلاج الكيماوي لسرطان الثدي لقوا العلاج فعال جدا لان الفتحات اللي عملتها مادة ميليتين خلت العلاج الكيماوي يدخل جوا الخلايا ويقتلها
طبعا ده لسه بحث على الفئران في المعمل
لكن حسيت ان مصر ممكن تطلع شغل جميل في الموضوع لو حصل تعاون بين كلية الزراعة وقسم علاج الاورام في كلية الطب
او زي ما يشوفوا
