جريدة الأهرام الجديد الكندية 
مقالات مشابهة
مجموعة صغيرة جدا من شباب الأطباء تحت تأثير ضغوط المهنة و ضغوط الحياة و تأثرهم بوفاة زميلهم قرروا أن يستقيلوا
سواء القرار خطأ أو متسرع أو عير مناسب أو مناسب لظروفهم فهم أحرار في حياتهم .
قوم أيه يا مؤمن بقى
مهندس الحي المرتشي المسئول عن كم العشوائيات الموجودة في حياتنا بيلوم الأطباء دول
و محصل الكهرباء اللي مَش بيقرأ العداد أو بيألف اى قراءة من عنده ويدخلك في شريحة اكبر بيتهمهم بالندالة
صاحب المحل اللي استولى على الرصيف و جزء من الشارع و مانعك أن تركن قدام المحل مصدوم من موقفهم المخزي
و موظف المرور اللي مضيع ملف عربيتك و خلاك تلف كعب داير بيقول عليهم خونة
و سواق الميكروباص اللي بيسب الدين اكتر ما بيتنفس بيتحسبن عليهم
و المدرس اللي آخر مرة مسك الطباشيرة علشان يشرح في الفصل كانت قبل حرب الخليج مندهش من سلوك الأطباء دول
و المقاول اللي بيبني عمارات بطريقة بناء الفرن البلدي على السطوح بيقول عليهم اخص و اخيييي
موظف الشهر العقاري اللي لو أنت محظوظ تلمحه في العشر دقائق اللي بيقعدهم في الشغل مستاء من تصرفهم
و الإعلامي اللي بيرفع المنصوب و بيجر خبر كان و بيقبض في الدقيقة اكتر من راتب الطبيب في الشهر كله بيندد بفعلتهم الشنيعة
مديرة شركة أدوية عايشة على الرشاوي و الواسطة و المحسوبية اسقط في يديها من فعلتهم الشنعاء
نعم قد يكون منهم من ينتمي لجماعة الإخوان لكنه لم يقصر في عمله و لم يؤذي مريض
هؤلاء الأطباء لم يعترضوا على العمل لكن اعتراضهم على عدم وجود أماكن لهم في مستشفيات العزل و على عدم توافر وسائل الحماية لهم و لأسرهم و للمرضى و ذويهم .
لست مع الاستقالة الجماعية لكني لا الومهم
و اتمنى من السادة الإخوانجية و الإخوة الأمنجية و البهوات السرسجية و البشوات اللي معاهم معاهم ان يجيبوا على هذه التساؤلات
كم عدد. الاطباء المستقيلين !؟
كم نسبتهم لباقي الأطباء !؟
ما هي عدم قانونية الاستقالة !؟
هل لو حضرتك أصبت بفيروس كورونا من طبيب هتسكت !؟
هل لو اصيب احد من أفراد أسرتك بسبب طبيب هتكون مبسوط !؟
اعتبروهم أخطأوا أيه بقى لزوم التطاول على باقي الاطباء اللي شايفين شغلهم بما يرضي الله !؟
الا يوجد بينكم رجل رشيد يتقي الله
شعؤلا بخس الحق ده
(هذه الصورة لكبار رجالات الدولة أستخبوا تحت الكراسي عندما لم تتوفر وسائل الحماية)
