جريدة الأهرام الجديد الكندية 
مقالات مشابهة
ماجد سوس
مين فينا محلمش مرة إنه يتفرج على كابينة طيارة او باخرة ويقعد مكان الكابتن او القبطان
مين فينا ماحلمش بفيديو أو صورة ويحطها لكل الناس مجرد تعبير عن فرحة التجرية أو تحقيق الحلم
الحق والإنصاف يقول
إن الطيار غلط إنه مرافضش عرض محمد رمضان لكن طالما وافق فتصرف رمضان كان طبيعي جدا زي أي مخلوق في أي مكان هاخد الصورة وهحطها وافرجها لكل عيلتي واصحابي والدنيا .. كلنا بلا إستثناء كنا هنعمل كده
النهاردة محمد رمضان بيتهاجم وبيلبس مسئولية عقوبة الطيار وطبعا ده كلام فارغ غير منطقي ..
محمد رمضان قرر إنه يدفع للطيار مرتبه كل شهر كما هو لغاية ما القضية اللي رافعها الطيار تخلص ..
الهجوم على محمد رمضان غير مبرر .. اسماعيل ياسين كان بيغني اغاني هلس ويعمل حركات عبيطة وكنا حاطينه في السما .. معرفش ليه حاسس كده في ريحة حقد على تمييز بين الناس ..
يعني انا مكنتش بطيق سيد زيان ووحيد سيف ومحمد نجم وكنت حاسيسهم دمهم تقيل وفاشلين لكن رأيي ده ما يمنعش إنهم إجتهدوا انهم يعملوا شعبية ويعملوا فلوس ..
محاولة ان تكرّه كل الناس في محمد رمضان عشان انت بتكره .. هي حاجه للأسف موجوده في كل مجتمعاتنا وحتى في كنايسنا ومساجدنا طالما بتحب بواحد تحطه في السما وعاوز تجبر الناس تعمل كده والعكس صحيح .
أنا فوجئت إن فيه ناس مش عاوزه محمد رمضان يظهر في برنامج مع وائل الإيبراشي كأنه عدو او مجرم وهمه عارفين انه لو طلع في البرنامج هيكسب كل جمهوره مرة تانية لأنه أكيد هيتساءل أنا إيه اللي عملته. لو اغنيتي مش عاجباك أقلب القناة ومتتفرجش . مش ده اللي كنا بنقوله للإخوان لما كانوا بيحاربوا البرامج والافلام
التربويون أجمعوا إن مسرحية مدرسة المشاغبين بوظت أجيال بس مسمعناش حد ساعتها طلب مقاطعة عادل امام وسعيد صالح وأحمد زكي ويونس شلبي وهادي الجيار
على فكرة أنا لا بشوف افلام ولا أغاني محمد رمضان ولا عاوز أشوفهم بس حاسس إن السوشيال ميديا بقت مصدر خراب وحقد وكره ونميمة لكل سكان الأرض.
