جريدة الأهرام الجديد الكندية مقالات مشابهة
بقلم : ماجدة سيدهم
يادوب لسه عايشين صدمة حفلة البطاطين نلاقي نفسنا في الأكثر انحطاطا واستغلال ..
صورة مش عاوزة أي كلام ولا تعليق غير أن الفجر والانحطاط وصل بيكوا كمسؤولين انكوا تتاجروا بالمرضى والمحتاجين ..شغل شحاتة رخيص ..
يبقى ماتستغربوش من المتسول اللي بيمشي بكيس القسطرة او أو مركب لنفسه نقل دم .. علشان يطلع له آخر اليوم بقرشين حلوين ..ماهو نصاب وبيضحك على غلابة
لو كان فيه مسؤول واحد او أي حد في المحروسة مهما علا شأنه اتحاسب على فساده واستغلاله لمنصبه ومكانته وكذبة بالوعود البراقة .. سواء بتصريح أو بقرار أو بصورة ليحقق أكبر مكاسب ممكنة ماكان تجرأ اليوم المسوؤلين الجدد يعملوا نفس قذارة الاستغلال …
دي مش جريمة عادية ياسادة ….دا انتهاك واضح وصريح للآدمية ..دا فعل فاضح في عرض الشعب ..الشعب دا كل يوم بتنتهكوه وبتكسروا نفسه وبتاجروا. بعوزه من أول استغلاله في الانتخابات لحد تصويره بالشكل المبتز دا …شاش على العيون ياجبابرة ..
طبعا ياحضرات الناس دي اتصورت مش حبا في مستقبلك الأسود لكن أكيد مقابل وعدك الرخيص بعلاج مجاني أو مساهمة في ثمن العمليةاو ..
للأسف بقينا عايشين في عشوائية أخلاقية كبيرة وكلنا بنشحت على بعض ..وترجع تقولي مستقبل ..اي مستقبل بتتكلموا عليه وأنتو مش شايفين سكة أصلا ..بسبب عمى القلب والعقل والضمير.
يادولة أنت بتعملي فينا كدا ليه ..هو احنا نستاهل كدا برضه ..؟
دا احنا اللي مستحملينك ع الحلوة والمرة واحنا اللي وا قفين ف ظهرك ..تعرونا وتذلونا كدا .. امتى تحترمونا وتحسوا أننا بنتوجع اوي ..
سؤال ..هو الحكم على خيانة الشعب بيكون إيه ..؟
وهل انتو عارفين اصلا أن دي خيانة واستغلال ولا لأ.
للأسف أنتو أكتر ناس بتهد في البلد وبتشوه سمعتها وهي مش ناقصة ..
كفاية جبروت واستخفاف بالغلابة ..اخرجوا برا مصر وسيبوها لولادها الطيبين المحترمين ..بس كدا
