جريدة الأهرام الجديد الكندية مقالات مشابهة
بقلم الكاتبة والأديبة : ماجدة سيدهم
بعد قرار السماح بنزول البوركيني لحمامات السباحة بالشواطيء السياحية ..البعض قال حقهم ..والبعض الآخر غضب ونقد وانزعج جدا وهاجم وقال دا تشويه وضرب للسياحة ..
طيب من غير لف ودوران ورغم انحيازي لبنات جنسي لكن كلنا متأكدين من انحدار الذوق العام في الشارع المصري وخصوصا شكل الستات بهلاهيلهم السودا من فوق لتحت ..وماحدش يطلع يقولي وانتي مالك .لأن مادام العباية والطرحة حرية شخصية يبقى الموضوع اجتماعي بحت ..
المهم ..لما الغالبية تصرخ من هجمة الجلاليب و البوركيني على شواطيء المحروسة اللي كان بيضرب بيها المثل في السحر والجمال والرقي .ببقى لازم وقفة (ااحقيقة البوركيني شكله مهين للست وبيقلل من قيمتها ومن قيمة المكان بصورة كبيرة جدا )
وللاسف الهجمة دي توغلت مؤخرا تحت شعار بفلوسنا ..تمام بس ياجميل بفلوسك دي يعني تلتزم بقواعد المكان وتحترم نظامه وآدابه ..مش العكس ..لأن سلوكك ومظهرك المفروض يعطي صورة مشرفة لسياحة بلدك ..
وهما سؤالين الأول لصاحب القرار التاريخي دا .. بزمتك أنت مقتنع و شايف أن دا منظر حضاري يليق بستات مصر اللي هم بنات وحفيدات الهوانم زمان ..أوعي تقولي أيوه مقتنع وأن دا تحقيق لمطلب الستات دا غير انه حشمة والتزام ديني
حاقولك رغم انه حرية شخصية لكن خلينا نقول زيك انه التزام ديني طيب أيه رأيك في فتاوى طلعت بحرمانية الستات من نزول البحر لأنه مذكر ..وما ادراك باللي ممكن يحصل ..شوف أنت بقا ..وقيس عليها حمام السباحة المذكر برضه . مش يبقى من الأفضل بلاش البحر وبلاها المصايف ووبلاش نهد في اللي باقي من السياحة ..
طيب ايه رأيك في لبس البيكيني فوق البوركيني ..ولا لبس البيكيني مع الالتزام بالطرحة..و هل نزولهم بالبوركيني حايمنع من البحلقة في كل واحدة نازلة وطالعة وهي مبلولة..
علي فكرة الطرفين فاهمين بعض كويس أوي وعارفبن كل واحد شايف التاني ازاي .الست متاكده أن كل راجل شايفها عريانة ملط فتتصور انها بكدا بتحمي نفسها وهو عارف انها عارفة قدرها الوضيع عنده ..شوفت أمخاخ انجس من كدا ..
*البوركيني فكر مش لبس .
السؤال التاني للستات…طبعا أنا مقدرة وفاهمة انه صعب عليكي ياحبيبة أنك تلبسي مايوه عادي ..أولا لأنك اتعودت عليه وبقى عرف ..وثانيا الخوف من قسوة المجتمع عليكي ..في حين أن دا قرارك وحدك ..
وكتير كمان بتكوني مش مقتنعة بيه فبتحاولي تخللي بنتك الصبية تلبس مايوه براحتها ..وبنشوف دا كتير
وبعدين بيني وبينك يعني إيه تطلعي مشوار سفر ومصاريف كتير علشان تاخدي أسبوع أجازة يتيم من بعد شقا سنة وف الاخر تلبسي كوم هدوم فوق بعض ..طيب ايه الفرق ببن البوركيني والعباية السودا
وبعدين فين متعتك انك تلتحمي بالبحر والهوا والشمس ..دا احنا كلنا كستات بنعاني من الهشاشة ونقص ڤ. د وعجزنا قبل أواننا .كمان شوية الشمس حايحرمونا منها ..
*عموما الحل سهل وناس كتير بيطالىوا بيه رغم خطورته ..وهو عمل شواطيء خاصة للبوركيني بس (محمية البوركيني ).ومن ناحية تانية وأهم نتفادي تشويه الشواطء السياحية ..
* رهان لو حصل وجهزت الشواطئ دي ماحد حايروح ..واللي حايروحوا حايقلعوه وحايلبسوا البيكيني فورا ..فين الحربة الشخصية هنا ..!
*البروركيني فكر مش لبس ..
*ملعون اللي كان السبب في تشويه العقل وتحقير الستات وحرمانهم ممن ابسط حقوقهم بانهم يبقوا ستات خلقة ربنا ، ملعون اللي زرع أحط الافكار ف ادمغة الذكور ..ملعون الف مرة ..
لاتشوهوا ستات مصر ..
ولا تشوهوا شواطيء مصر ..
البوركيني فكر مش مايوه ..
