محاولة ذبح قبطية بالجيزة بسبب عدم تغطية شعرها !!
الواقعة كما ترويها صاحبتها
حصل معاى موقف انهاردة يوضح مدى عشوائية وهمجية البشر اللي عايشين معانا .أقصد الكائنات الغريبة اللي عايشة معانا فى بلدنا .
كائنات مينفعهش تكون بشر ولا حتى حيوانات .
الخميس الموافق 23/5 الساعة تقريبا 12 ونصف ظهرا كنت سايقة عربيتى فى شارع صلاح سالم الموجود بالجيزة وتحديدا بالقرب من مدرسة النهضة .حسيت ان فى مشكلة فى العربية فركنت على جنب وبكل هدوء نزلت اشوف الكاوتشات .
لقيت الكاوتشات الامامية سليمة بعدها رايحة اشوف الكاوتشات الخلفية .فى الوقت ده اتجه على وبسرعة شديدة موتوسكل عليه شخصين واحد منهم قالى غطي شعرك و مد ايده بحاجة على رقبتي وتسبب لى فى قطع فى الرقبة.
طبعا دخلت العربية بسرعة وحطيت كيس المناديل كله على رقبتي واتصلت بصديقة قريبة من المكان اتعاملت مع الموقف بمنتهي الذكاء لغاية المستشفى ولغاية ما زوجى وصل وأكمل الاجراءات .
انا بكتب البوست دة لانه مش حادث فردى لكنه حدث فى الجيزة ايضا من شهور مع أعز صديقاتى وتسبب فى جرح عميق بذراعها
عايزه اسال الشخص ده وكل واحد زيه هل أنت عارف أنك كان ممكن تسبب فى موتى ؟
هل مستوعب حجم اللي عملته أو قلته ؟
هل مدرك لو الشئ الحاد اللى انت ماسكه دخل فى رقبتى أكتر من اللازم كان ممكن يحصل أيه؟
أكيد دى مش أول مرة تعمل كده ؟ وهل أنت بتجرب علشان تعملها تانى ؟
مين أعطاك حق الأمر والنهى؟
هل أنت معدوم الاخلاق ام معدوم الضمير ؟
هل أنت همجي وبلطجي أم مقتنع بافكارك؟
لو أنت مقتنع بافكار معينة طبقها على نفسك مش على غيرك.
ممكن تقولى انت أو غيرك بتستفادوا أيه ؟
هل كل واحد ييجى فى دماغه حاجة بيعملها ؟
هل كل واحد يدور براسه كلام فبسرعة يقوله بغض النظر هيؤذى غيره أم لا ؟
جايز تكون بعيد عن أعين الشرطة بس الأكيد أنك مش بعيد عن عين ربنا؟
![السيدة المسيحية](https://www.ahram-canada.com/wp-content/uploads/2019/05/مسيحية.jpg)