خليها تعنس

مقالات مشابهة

علام تتنازعون

‏3 أسابيع مضت

الهدم يبدأ من التعليم ..الجريمة الوقحة

‏4 أسابيع مضت

نصف الحق يعثر الكثيرين

‏4 أسابيع مضت

قال # خليها تعنس

ردت عليه #خليك جنب أمك ..

بصرف النظر عن انحطاط وسوقية مستوى التعبير والشماتة والتشفي والعداء المتبادل لكن إيه اللي يخلي الحليوة يقولها كدا وليه الأمورة ترد عليه أو بالأصح تتف عليه ب خليك جنب أمك ..يعني نقدر نسميها حملة # ماتلزمنيش ياحيلتها ..

من غير لف ولا دوران هو إحنا زعلان ليه.. ماهي دي تربيتنا ومفاهيمنا وبيوتنا وتراثنا .. دا كل اللي نعرفه عن الحياة و الزواج وتأسيس البيت .. ودي نتيجة طبيعية جدا جدا

البيت اللي بيتأسس النهاردة أبعد مايكون عن الحب والاحترام والإنسانيةوأبعد مايكون عن بيت جديد المفروض أنه يضيف للعائلتين فرحة ونمو ولمة أكبر وأشمل ..

حتى شوية الكراكيب (الجهاز ) عليهم خناقة ..

*بساطة أنا الأم وعندي شاب وشابة ..بربي بنتي إن العريس الي حايتقدم لازم يطفح الدم ويجيب الف مليون حاجة ملهاش أي ستين لازمة ..بس يجيب .. وإحنا اللي نملي شروطنا عليه مادام عاوزها ..بنتي مش بايرة ..دي عود وشهادة دبلوم ولا ليسانس مش مهم ..ولا هي أقل من فلانة ولاعلانة وإن كان عاجبه حايشيل ..ولما يبقى يتعصر وينقط من دم قلبه كدا نبقى ندخل ونساعد باللي نقدر عليه ..علشان يعرف قيمتها دا غير المؤخر طبعا (شوفتوا سوق النخاسة )

بنتي حبيبتي مقتنعة جدا بكلامي لأنها تربيتي .. وأنه لازم بشيلها على راسه والكلمة كلمتها ..ولو بتشتغل ماتحطش مليم في البيت دي مسؤليته يصرف عليها. حتى لو ريقه نشف ..وبعدين هي وشطارتها معاه علشان ينسى لها أي فارغة وكل ماتتشخلع له كل ماتنسيه أهله…وكل اللي هي عاوزاه تطلبه في السرير (دعارة بختم ) وعلى رأي المثل” اللي أغلى من أمي وأختى هي اللي اخر الليل ألقيها تحتي” ..(مثل حقير ورخيص لكنه متداول ) .. وإن ماكنش عاجبه خليه جنب أمه ..

* أنا برضه نفس الأم اللي بربي ابني على أن كفاية أوي أنه راجل (امتياز ذكوري مبتذل )وعنده شقه ..ولو ماعندوش يبقى لما يتجوز يعيش معانا بنفس البيت ..مراته لازم تساعده وتحط مرتبها معاه في مصاريف البيت .. ومايحطش رقبته تحت دراع أهل مراته . ويطاطي لطلباتهم ..لأن دايما أهل البنت طماعين ..وأي بنت مش آخر واحدة والبنات على قفا من يشيل .. وإن كانت وحيدة اهلها فلازم يساعدوها بالأوي ..وإن كانت بنت ضمن أخوات يبقى لازم يدفعوا برضه علشان يخلصوا من واحدة.(نفس سوق النخاسة . ) هو حد لاقي رجالة ..وبعدين الرحمة حلوة ماهو الحال صعب على الشباب برضه حايجيب منين بيت وعفش زي إعلانات التليفزيون..والبنات طماعة وهمة لاشكل ولا منظر وكل واحدة فاكرة نفسها حاجة وكمان عاوزة حاجات مالهاش ستين الف لازمة . يرمي لهم المهر وما لوش دعوة ..

بربي كمان إن سلاحه السرير هو صاحب الكلمة والأمر والأ.. دا الشرع ف صفه ..بني مقتنع جدا بكلامي لأنه تربيتي فإن كانو شاريين راجل طول بعرض أهلا وسهلا ..مش عاجبهم خليها تعنس ..لما يجيلها الفارس أبو حصان أسود ..

أنا نفس الأم (المجتمع )اللي ربيت الخرابات دي لأن أنا أصلا تربية خربانة وتراث فاسد ..ربيت أجيال ضحية أفكار مسمومة بالجهل والعداوة والكذب ..أجيال مشوهة ومعقدة نفسيا ومحرومة وخايفة ..مابتعرفش تحب ولا تتفاهم ولا تسند بعض ولا تحن على بعض ..أجيال بتعمل كل حاجة في السر..متحرشة ومتلصصة ومفضوحة .. ووقت الجد تتشرط.. اجيال مابتسبش فرض ..

تفتكروا انتين بالعداوة دي إيه شكل العلاقة بينهم ..!

*نكون واضحين .. مش لازم كل الناس تتجوز ..او بالأصح نقول السؤال. هو احنا بنتجوز ليه ..! مع العلم الزواج مش سنة الحياة ..لأنه مش قضاء وقدر ..دا اختيار وحب ومسؤولية ..

للاسف بقينا مجتمع كاره الحياة وكاره نفسه والجواز عنده مش أكتر شوية سجاد وفضية وكولدير ميه وأوضة نوم تؤكد على فشل العلاقة بأعلى معدلات طلاق وبأسرع وقت.. دا رغم التكاليف المرعبة والمهجدة والديون المتلتلة ..

لما المجتمع يعرف يحب لا هي حاتعنس ولاهو حايبقى جنب أمه ..

وللحديث بقية ضروري ..