جريدة الأهرام الجديد الكندية 
مقالات مشابهة
محمد مصطفى محمود
١ – فصل 5 جلبيات بلدي صوف غاليين بالجلبيات البيضة اللي تحتيهم وشال كشمير محترم
٢ – تروح أي عزاء في الدايرة وتدخل من قدام حتي لو في قرايبك من هو أكبر منك سنا ومقاما
٣ – تروح أي فرح دعيت إليه أم لم تدعي وتسلم علي كل الفرح أهل العريس والعروسة والمدعويين
٤ – تتصرف ولو حتي هتستلف وتدبح عجل كل سنة وتوزعه علي كل الناس الباينة اللي ممكن تحشدلك أصوات
٥ – تسمع عن أي صلح تروح تحشر نفسك في اللمسات الأخيرة وتقعد من قدام
٦ – تسمع عن أي ست غضبانة تروح لجوزها وتسمع منه وتأخد حد من أهله وتصالحهم
٧ – تنزل يفط كتير في العيد ودخول رمضان وتحط صورتك وتهنئ الأمة الإسلامية وفي الاعياد المسيحية تهنئ الأخوة الأقباط
٨ – اوعي تقرا سياسة عشان مش هتفهم حاجه واذا حد من المواطنين سألك أي سؤال سياسي ترد بإجابة واحدة ربنا يصلح الحال
٩ – تمشي مع التيار لو الحكومة وفدية تبقي وفدي ولو حزب وطني تبقي وطني ولو تيار اسلامي تربي دقنك
١٠ – تسمع عن اي مدرسة هتتبني
او اي شارع هيترصف تروح كاتب طلب وتذهب به الأبنية التعليمية او مجلس المدينة وتدَّعي كذبا وزورا وبهتانا أنك أنت اللي عملته
١١- أي افتتاح لأي مدرسة أو طريق أو شارع او مصنع علي طول تروح رايح وتحشر نفسك وتتصور
١٢ – أي مسجد هيتبني تروح وتدفع تبرع مالوش لزمة عشان تحضر افتتاح المسجد كإنك إنت اللي بنيته
١٣ – أي فرصة للخطابة في أي مناسبة
امسك الميكروفون وقول كلمتين
١٤ – تنتقد المستشفي بمناسبة ومن غير مناسبة
١٥ – تصاحب الضباط وأمناء الشرطة عشان لو حد اتمسك
تروح تطلعه من المركز
١٦ – لو الجلبيات دابوا
فصل جلبيتين تانيين
١٧ – عربيتك لازم تكون كبيرة ومحترمة ولو ماعندكش استلف عربية من حد تبعك عشان لما تروح عزا او فرح
١٨ – ماتمشيش من غير ٥ او ٦ رجول دكك حواليك يعملولك جو وكده
١٩- كل بلد تروحها تقوللهم ايه اللي ناقصكم ؟؟ يعني قال انت اللي ها تكمله
٢٠ – اي حد بيتفزلك وبيسأل أسئلة كتيرة وصعبة صاحبة بسرعة وخد تليفونه وقوله أنت عجبتني عشان مخك حلو ونور عشان ينشغل بكلامك ويبطل يسأل ..
21- وتصاحب طوب الأرض وتقعد عالقهاوي وتلم شلة حواليك بحيث يكون ليك هيبة كدة وزيطة كدابة ودايما صوتك يبقي أعلي من كل الموجودين للفت النظر والانتباه ..
و يا سلام بقي لو بتشرب شيشة كمان بتحس انك معلم وابن سوق وفاهم في كل حاجة.
