جريدة الأهرام الجديد الكندية 
انا اسمي رامي وحيد مصري الجنسيه مسيحي الديانه
الحكايه بدات امبارح كنت سايق عربية اختي ( بشتغل عليها ) في الدقي وقابلني كمين وقفني ظابط ملازم اول ( عرفت بعد كده ان اسمه ) ملازم أول أحمد عبد الفتاح زيدان فطلب مني الرخص ورتهاله فلقي الرخصة منتهيه من اكتر من عشر ايام فقولتله ياباشا ليا سماح شهر خصوصا ان العربيه قسط فمستني جواب البنك وعموما عاوزني ادفع اي مخالفه انا تحت امرك
فقام الظابط ده رد عليا وقالي العربيه ده مسروقه ياض ومسك الرخصه فتح الوش البلاستك بتاعها وقطعها ورماها في وشي وقالي عشان تحرم تمشي برخصه منتهيه
فبصيت وانا مندهش ومش عارف اعمل ايه فبقوله ليه كده ياباشا ده حرام
قام رد وقالي حرام وحلال ايه يا روح امك انت تعرف الحلال والحرام منين يا ابن دين الكلب
والله كنت هعيط من وجعي اني مش عارف ارد عليه مش عشان خوفي منه عشلن ظابط بس لكن كمان ماقدرش اسبله الدين لان كل اصحابي من المسلمين وقمة الاحترام فجيت اعاتبه واقوله انت ترضي اسب دينك ؟
فقام الظابط ده رد وقالي زعلك سب الدين طب يالا امشي من هنا يابن كذا وكذا وسب الدين تاني وفضل يلعن ويشتم في المسيحية
انا كنت هسامح فموضوع الرخصه بس بعد اهانته ليا قولت لازم اخد حقي مش برضه مافيش حد فوق القانون وده كلام الريس برضه !!!
اتصلت باختي عشان العربيه باسمها وطلعنا علي قسم الدقي نعمل في الظابط محضر وانا مستني ولاطعني وقت طويل مس عارف ليه لقيت الطابط بتاع الكمين اللي شتمني داخل عليا وقبض عليا وقالي انتي جيتلي برجليك وطلع حتة حشيش من جيبه وقالي ده بتاعتك وهحبسك وعمل مذكرة ولا مش عارف محضر واجبرني امضي عليه وقالي ده عشان لو فكرت تعمل فيا محضر هحزن امك عليك يالا امشي من هنا .
وطبعا عشان انا لسه مقتنع ان مافيش حد فوق القانون وان لو حتي ظابط وحش فيه الف كويس جريت عالوزاره عشان اشكي الظابط فبعتوني لكلية الشرطه لموظف اداري مش فاهم اي حاجه
قومت طالع عالمديريه وعملت شكوي وخدت رقم صادر الغريب وانا هناك ظابط برضه قابلني وانا طالع وواضح انه صاحبه وفضل يهدد فيا بطريقة النصيحه واني لازم اسحب الشكوي لاحسن اتاذي
نفضتله ومشيت ومارضيتش اسحب الشكوي وروحت
ودلوقتي انا خايف جدا علي نفسي ومستقبلي واهلي لاحسن ياذيني وينفذ تهديده
وفنفس الوقت زي ما اقبلش ابدا حد يهين حد صاحبي مسلم بكلمه مش هقدر اقبل علي نفسي واحد حتي لو ظابط يهين ديني ويلعن ملتي ويستغل نفوذه وضعفي .
ده يرضي حد فيكم اكيد لا ولا يرضي ربنا حتي
ملحوظة# للعلم اكتر شيء واجعني اني كنت من الشباب اللي بتدافع عن الاقسام ايام يناير ومن الشباب اللي راحت محمد محمود وقفت تحمي وزارة الداخليه مع العساكر والظباط ايام واقعة محمد محمود ده انا كمان طول منا ماشي اي حد لابس عسكري ولا امين شرطه ولا ظابط بقفلهم واوصلهم لوجه الله
