ماجدة سيدهم تكتب : والمهر صنية بطاطس بالفراخ

مقالات مشابهة

علام تتنازعون

‏أسبوعين مضت

الهدم يبدأ من التعليم ..الجريمة الوقحة

‏3 أسابيع مضت

نصف الحق يعثر الكثيرين

‏3 أسابيع مضت

قامت ..الست الشيك ..أم العروسة …م النجمة تجهز سفرة فوق الوصف ومالذ وطاب من أشهي وأغلى المأكولات البحرية في استقبال عريس بنتها وأسرته ع العشا ..وطبعا البنوتة الجميلة الدكتورة بتحاول تكون هادية زي أي عروسة لسه في بدايات التعارف على العريس المتقدم لها وخصوصا انه ترشيح أبونا .يعني زي ما اتعودنا إنه محل ثقة ..

العريس شاب وسيم وثري .. مهندس بالخليج .. وآخر وجاهة ..فرز أول يعني ..

الاستقبال جميل وراقي

..وأكلنا والحمد لله وقعدنا ندردش ونشرب الساقع والسخن ..تمام العريس اللقطة ..راح .يستعرض ثروته .. في الوقت اللي راحت مامته حبيبته تلف بيعينها تفاصيل أثاث بيت العروسة اللي هو العفش .وتمدح بغرور في كتل الموبيليا المدهبة للي في بيتها والستاير الاوتوماتيكي والنجف اللي بينور ويطفي لوحدة والسجاد ما اقولكوش والديب فريز والأنسر ماشين ..كله كله فرز أول برضه ..ومانسيتش تقول شعر في ضخامة صاحب الفخامة النيش الإعجازي بمشتملاته اللميعة..

خلصت الزيارة أو العزومة ..أيوه خلصت..فل الفل .. بس مجرد ماوصل العريس البيت وقبل مايهضم أكلة السمك والسي فود راح مكلم العروسة بغضب شديد جدا

: إيه دا انتو عاملين لي سمك وجمبري .. بزمتكوا دا أكل يتقدم لعريس..انتو ناسين إن عندي شقة في التجمع ..

: ايوه ..طيب فين المشكلة ..النهاردة الأربع صيام وبكرا فطار العدرا ..

: وأنا مالي .. فين صنية البطاطس بالفراخ .. أمك لو ست ناصحة.. قاطعته باستنكار :أمك …

: أمال أمي .. كان لازم تفهم إن مش ضروري العريس يكون صايم

:طيب مافيش مشكلة ..متعوضة

:يعني ايه مافيش مشكلة .. وهاكلها تاني ازاي بعد مزاجي مااتخرم .. ياهانم ياللي المفروص إننا بنتعرف على بعض .. أنا جاي وفي بقي طعم البطاطس بالفراخ في الفرن …عموما إحنا لسه ع البر

: انا بجد مش مستوعبة ..بيتهيألي إن فيه حاجات أهم ..

:هو ايه اللي مش مستوعبه ..هو أنا بتكلم ف صنية في فرن بلدي دا يادوب تسوية بتوجاز .. .وبعدين هو إيه اللي مش مهم ..دي نقط ع الحروف ..زي المهر ..جمبري ..حد يقدم جمبري ..إنت ناسية إن عندي شقة في التجمع ..

.وأغلق الخط ..

:الو .. أبونا حصل كذا وكذا

:ايوه حكى لي .هو فيه إيه يابنتي .إنتو مزعلينه ليه ..

:بطاطس إيه با أبونا اللي بيتكلم فيها ..دا ماينفعش خالص

: إنتي بتعترضي على إيه .. هو إنتي تطولي .. ماتوافقي وإنت ساكتة ..دا لقطة ..ولا من قلة البنات ..لو مش عاجبك حاجة بكرا يتعدل ..دا مهندس في الخليج ..

واغلق الخط ..

دي حكاية بنوتة حبت تاخد بتارها من عريس مالوش تفسير …بأنها هي اللي تنهي الحكاية اللي لسه مابدأتش ..لكن للأسف سافر وأغلق الخط .. ونرجع نسأل ليه البيوت فاشلة من جوة … تفتكروا عينة شاب زي دا يعرف أو يقبل يكون له شريكة وحبيبة في الدنيا يعيشوا وينجحوا ويكبروا سوا .. يعرف يعمر بيت .. .طب إزاي إذا كانت صنية البطاطس شايطة م الأول .. ومع ذلك أغلب الجوازات بتم بالتغاضي عن كل شيء وأهم شيء ..النضج والإحترام وفهم يعني إيه حب و ارتباط ..!

مصيبة اتجوزيه وبكرا هايتعدل ..