جريدة الأهرام الجديد الكندية 
مقالات مشابهة
بقلم/ ياسر العطيفي
الشعب المصرى بيعانى من قلة الشغل وضيق الحالة والظروف والغلاء والوباء ،ثم نتسائل في بلاهة هو ده بيحصلنا لية !!؟؟ وبدل ما نتجة للركن الشديد الفعال لما يريد وهو الله ،لا ده إحنا كمان بنحاربة بالمعصية ..ظاهرة عفنة بدأت تنتشر بشكل غريب فى مجتمعنا المصري ، وأنا كرجل بصراحة لا أعرف ماهي المتعة أو اللذه أو الإشباع فى ذلك !!؟ بل هو إمعان فى الإمتهان والإذلال والتحقير بالمرأة ، الظاهرة دى هي ظاهرة التحرش ، وخليني أقول بصراحة اللى هيتكلم عن موضوع اللبس علية مراجعة مفردات رجولته لأن فى منتقبات بيتم التحرش بهم وهم فى كامل الإحتشام !!؟ومهما كان اللبس فده مش وازع لأى شخص لإنتهاك كرامة البشر،والست بطبعها بتحب تكون جميلة مهتمة بمظهرها ، معتزة بأنوثتها وتحب تدللها ،فهى لما تكون جميلة مش معنى ده إنها طالبة حضرتك !!
سيدنا النبي صلى الله عليه وسلم قال : (لَا تَكُونُوا إِمَّعَةً ، تَقُولُونَ : إِنْ أَحْسَنَ النَّاسُ أَحْسَنَّا ، وَإِنْ ظَلَمُوا ظَلَمْنَا ، وَلَكِنْ وَطِّنُوا أَنْفُسَكُمْ ، إِنْ أَحْسَنَ النَّاسُ أَنْ تُحْسِنُوا ، وَإِنْ أَسَاءُوا فَلَا تَظْلِمُوا) رواه الترمذي (2007) بإسناد ضعيف .
ومحدش يتعلل برضى بظروف إرتفاع تكاليف الزواج لأن طبيب البشر وصفلنا العلاج
قال رَسُولُ اللَّهِ صَلَّى اللَّهُ عَلَيْهِ وَسَلَّمَ : ( يَا مَعْشَرَ الشَّبَابِ مَنْ اسْتَطَاعَ منكُم الْبَاءَةَ فَلْيَتَزَوَّجْ ، فَإِنَّهُ أَغَضُّ لِلْبَصَرِ ، وَأَحْصَنُ لِلْفَرْجِ ، وَمَنْ لَمْ يَسْتَطِعْ فَعَلَيْهِ بِالصَّوْمِ فَإِنَّهُ لَهُ وِجَاءٌ )
قصتين بتوريكم قد إية وصل ببعض المصريين دنائة التحرش فى البر والبحر كمان
،وكأننا نسمع قولة تعالى .
(ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُم بَعْضَ الَّذِي عَمِلُوا لَعَلَّهُمْ يَرْجِعُونَ (41)
القصة الأولى فى الصورتين الأوليين
المصريين خلصوا تحرش على البر ودلوقتي إتجهوا للبحر .. Diving guid اتحرش بسائحة روسية تحت الميه !!! ونرجع نبكي ونقول هو مفيش سياحة بتجيلنا ليه!!؟
القصة التانية فى الصورتين التاليين
سواق ميكروباص إتحرش بواحده بنت راكبه معاه . استغاثت بالناس في الشارع مسكوا السواق و هروه ضرب و قلعوه هدومه و وقفوه علي عربيته انتظاراً للشرطه !
وخلينا نتكاشف ونتصارح وللأسف الشديد فى مجتمعنا الأقصرى الصعيدي(المحافظ) فى بعض حالات تحرش بتحصل لسيدات وفتيات فى سيارات السرفيس والأمثلة كثير ولكن يمنعنا الحياء والسرية من الإفصاح عنها ،وبتبقى من حد فى الكرسي اللى جمبها أو حتى اللى وراها ،أو حتى اللى بياخد الاجرة من إيدها وللأسف لأنهم بيتصدموا أو مبيعرفوش ياخدوا حقهم من هول المفاجأة ،أو أدبهم وحيائهم أو حتى الخوف بيمنعهم إنهم ينطقوا ،أقصى حاجه بيعملوها بيوقفوا العربية ويضطروا ينزلوا ،لكن وهى نازله بيبقى كم الألم والإحساس بالمرارة والقهر والإذلال من جواها كفيل إنه يقتلها ويموتها وفى البعض منهم بيدخل فى حالات نفسية صعبة !!
يا سادة القتل مش إنك تمسك سكينة أو طبنجة ،فى قتل من نوع أخر قتل بدم بارد ،كلمة ممكن تقتل ،نظرة ممكن تقتل ،وتحرش ممكن يقتل ،ياريت نكرم بعض بالإحترام ،ياريت نبص للى قدامنا كإنسانة ،روح أمرنا الله ورسولة بحرمة ترويعها
