جريدة الأهرام الجديد الكندية مقالات مشابهة
كشف أحد المواطنين، يدعى أحمد سمير، عن حيلة «جديدة» لتخلص والهروب من فواتير الكهرباء المرتفعة.
وقال «سمير» في منشور تداوله رواد موقع التواصل الاجتماعي «فيسبوك»: «الشهر اللي الفاتورة جات 261 جنيهًا، كانت الشقة معظم الشهر مقفولة وسكينة الكهرباء نازله وبما أن شركة الكهرباء تسرقني عيني عينك وببجاحة وعشان اشتكى وأتظلم لازم ادفع الأول ويهدوني أنهم يشيلوا العداد فأنا قررت استغنى عن خدمات شركة الكهرباء والعداد و الكهرباء».
وأضاف: «بحثت على الإنترنت عن أرقام وعناوين شركات الطاقة الشمسية وسألت عن أسعار المكثفات وبصراحة لاقتها غالية جدًا وتبدأ من خمسين ألف، وبردو لاقيت أن إنتاجها للكهرباء غالى جدا فكلمت مهندس كهرباء وعملنا دراسة للفكرة، ولقينا أن مكثف بـ110 ألف جنيه يقدر يغذى 25 شقه فعرضت الفكرة على جيراني في العمارة وكلهم وافقوا وتحمسوا للفكرة إحنا 24 شقة يعنى كل شقه تدفع 5 آلاف جنيه تقريبا ونرتاح من قرف فواتير الكهرباء كل شهر».
وتابع: «وفعلا بدأنا في تنفيذ الفكرة وبإذن الله الشهر المقبل نروح شركة الكهرباء نقولهم مستغنين عن خدماتكم تعالوا اقطعوا الكهرباء والغوا التعاقد معانا، للعلم فيه شركات للطاقة الشمسية بتقسيط وكل الشركات عاملة ضمان و صيانة مجانية لمدة عشر سنين».
وواصل: «ياريت الفكرة دى تتعمم والله تبقى أحسن وأوفر من جميع الجهات أولا، توفر فلوس ومحدش يسرقنا، ثانيا مفيش كهرباء هتقطع، ثالثا، توفر الغاز والجاز اللي محطات الكهرباء شغالة بيه، رابعا طاقة نظيفة غير ملوثة للبيئة والفلوس اللي تدفعها في قسط المكثف هي هي نفس فلوس فاتورة الكهرباء بس بعد ما القسط يخلص».
واستكمل: «هتستخدم كهرباء من غير ما تدفع ولا مليم، يبقى أيه الأحسن ادفع 200 جنيه قسط لمدة 3 أو4 سنوات وتبقى كهرباء خاصة بي وملكى ولا ادفع 250 كل شهر وكل سنة تزيد وممنوع اشتكى أو أتظلم».
وختم: «يعنى شركة الكهرباء بتقولها صريحة للمواطن هسرقك وأضربك على عينك وإياك تقول أه وهنقطع عنك الكهربا ونشيل العداد … لأ بقى كفاية كده أنا اللي هروح لهم الشهر اللي جاي أقولهم تعالوا خدوا عدادكم ومستغنى عن خدماتكم».
