آخر ذنب

كان آخر ذنب خطيته يجوز اني موسعتش فستاني 
ورسمت الكحل كلام معسول 
والحنه اترصت علشاني 
رصت فتارين 
لميت اصحابي واحبابي .. 
وقفوا ف صفين 
وبدأت اوزع من جيبي 
فل وياسمين
وعقود بتاكد ملكيه 
مدفوعه الاجر علي الضحكه… 
كان ذنب جديد 
ازاي بتقسم مية حته 
واتوزع بينهم عالفاضي 
واوزع من روحي تملي 
علشان ماضي 
بيسرسب روحي ف جرح جديد
ازاي بيأمنوني ف ضحكي 
ودموع علي خدي تملي تسيح
طب ليه تماسيح 
بيعيطوا وقتي علي عياطي 
وبينهشوا بنيابهم لحمي ؟؟
وازاي مني وازاي منهم 
دا المر مسرسب تفاصيلهم……..
طب آخر ذنبي ان نسيته؟؟؟
او انتي اتعودت غيابه !!!
او اني يجوز رديت بابه..
وفتحت بيبان ملهاش اخر 
واخدت الخطوه بروح ساخر 
عمال يستهتر بالدنيا.. “))
مسرح هزلي 
والكل مشارك في التمثيل 
كان ذنبي تقيل 
عمال بيخرب في حياتي 
عاشق تفاصيل لون الوحده 
طعم الكسره والدمع كتير 
بيفيض ويكفيني يوماتي
طب ليه فاتت
وسابتني لمين
طب شوفتوا حزين 
عمال بيضحك في الدنيا 
ويزغزغ روحه بتفاصيلها
كان ذنبي ساعتها يجوز مبهوم
او مش مفهوم….. طب فين اذنبت
طب ايه الحد اللي خطيته
طب خنت الوعد
طب ايه في الدنيا دي هديته
كان آخر ذنب خطيته يجوز إن موسعتش فستاني !! .

بقلم :منار بيومي