جريدة الأهرام الجديد الكندية مقالات مشابهة
عمدة نجع الطاهر عمل ليلة كبيرة قوى عشان يطاهر العمدة الصغير طويل العمر, واتلم أهل البلد واتملت البيوت زغاريت فرحة كبيرة قوى اومال هنقطع حتة جلدة, ما علينا كل واحد حر يعمل عرس زى ما هو عاوز خلى الناس تاكل وتتبسط, لكن كان فيه واحد محروق قوى ومش غريب من العمدة, وكانت مرته بهانة ارشانة زنت على ودانه كيف وكيف العمدة يعمل عرس ويغيظنا عشان حدانا بنات ؟ وكانت فيه دبيحة جاهزة اسمها عفاف عليها الدور في الختان وحلفت براس أبوها إن تتعمل للبت ليلة وعرس اكبر من بتاع ود العمدة اومال, وطبعا جنابه جاته الفكرة على الطبطاب وقام طاهر اخو العمدة يعزم أهل البلد ويدبح الدبايح وجات اللحظة المشؤومة لما سحبوا البت زى البهيمة ورفعوها من رجليها وهى بتصرخ وبتموت من الخوف جه عم صلاح الباش تمرجى ومعاه موس بربع جنيه قام قاطع, ونزل الدم يسيح وغرق يده وأمها قال إيه بتبكى دموع التماسيح وأبوها واقف مبسوط وخالتها بتزغرت قامت طيران على الفرن وجابت ترابه وقالت خدوا اكبسوه يبطل الدم طوالى, وجدتها جابت برطمان البن عشان تزود بيه الكبسة ولسه الدم بيسيل, حلاق الصحة كان قلبه جامد طمنهم كلها نص ساعة وتبقى عال, وفعلا زى ما قال ارتاحت المسكينة من خلقهم العفشة وراحت عند مولاها تستريح من بلاها, وتعيش وتطاهر يا طاهر, وأصل الحكاية إن بلادنا ودكورتها بيكرهوا البنات وخلفتها فيقولك نطاهرها وإذا قامت منها زى القطة بسبع أرواح يبقى زين, وإذا غارت فيها يبقى زين قوى وطبعا يبقى قتل بدون عقاب ولا ياخد فيها ساعة نصيبها أكده ومش بعيد اللي يقتلها يكون دكتور بسماعة, ودا وأد جديد للبنات ويقولك دى عادة فرعونية مع أجدادنا سجلوا كل شئ على جدران المعابد الولادة والمحراث والحصاد حتى مشط الشعر لستات مصر الأميرات وما فيش حتة شقفة عليها طهارة بنات يا حضرات, والصين عملت عروسة ست كاملة كأنها حية تمام وبتعمل فلاشة تنقل البوسة بالنت, ولسه عم بدوى يقولك لازمن نقطع الحتة عشان الاحتكاك طيب ما عندك أطول وبيتطلطل تيجى نشيل منه حتة ولا اتنين ترضى يا زين ؟ وهنروح بعيد ليه مش جنابك بتتخمد وتقوم غرقان في شبر مية من غير ما حد يلمسك ولا يجى جنبك, المخ يا عديم العقل هو اللي بيديك الصور وبيحرك العضو فيقوم بنفس ذات الفعل بدون ما العين تشوف ولا اليد تطول, والعضو بيفضل في سابع نومة وبيشخر لغاية ما جنابك تفكر وتبص وتتحرق يقوم يتحرك, وفيه عضو رافع رايتنا قالك لازم نطاهر عندهم ضعف جنسي رجالتنا, وافتكرت عبعال في أول مشهد من مسرحية ريا وسكينة لما كان بيكلم الراجل اللي بطحته مرته وضربته بالقباب وقال: بتفول علينا يا سبع البربمة يا رافع رايتنا, طيب وعشان أنت عاجز عاوز تعجزها جنبك وتجعل منها جثة بدون احساس, ولا العقل بيقول نسيب الهبابة دى عشان تحيى الإحساس ولا هي الحرمة ولا ليها حق عندكم ولا أصلا ناس !!! والكفيف برضك يقدر يتصور ويتخيل وهو مش شايف ومخه شغال يا أبو مخ واقف, ومش بعيد مخصي ولا عاجز جنسيا زى اللي قال عليهم بسلامته يدير شبكة دعارة كاملة ويتلذذ بمناظر العاهرات وهو ولا يقدر ولا يطول, وبالمناسبة تتفضحوا في كل مناسبة زى ما جرستونا ان جميع العاهرات مختونات ولا سمعنا ان قطع الحتة نظف من الدعارة الشارع والحتة, شرف البت وعفتها في تربيتها ما قالتلكش أمك انها كانت في الغيط وهى بت بمية راجل, ولا أنت مش من دول ودلدول عاوز تعجزها وبدري تجوزها, ويقوم جوزها في الدخلة يعرف الوكسة ويفضل يضرب ويلطش ويقولها أنت باردة ليه وجثة, مع ان جنابك سبب الوكسة قطعت الهبابة وخليت الهباب والعذاب فطور وغدا وعشا, وهنقول إيه الشكر للفياجرا اللي ساترة على اللي عامل عنتر وبترفع سيفه وكلها كام سنة وهو بيبلبع الصيني والمضروب منه يتكسح وتقوم وليفته عليه بأبو وردة لأنه خلاص ماعدش قادر يا ولداه, ومش بعيد تروح تدور على غيره وهى برضوا مختونة, يا عالم فكروا وارحموا البلد وارحمونا !!!
جرجس ثروت – عضو اتحاد كتاب مصر
