جريدة الأهرام الجديد الكندية 
مقالات مشابهة
محمد السيد طبق
هنتكلم فى الموضوع ده عن أنواع المحافظ من خلال النقاط التالية:-
1 – أين تخزن العملات؟
2 – أنواع المحافظ
3 – أنواع منصات التداول
– أين تخزن العملات؟
كل العملات موجودة على شبكة البلوكتشين
ومفيش محفظة بتسحب عملاتك من على شبكة البلوكتشين
لان العملات ماهي إلا أكواد برمجية مشفرة موجودة على شبكة البلوكتشين
وكل المحافظ ماهي إلا واجهات بتسهل لك التحكم فى عملاتك على شبكة البلوكتشين
مايتم تسجيله فى المحافظ هو التشفير الخاص بعملاتك (عناوين تواجدها على شبكة البلوكتشين)
لكن وخلي تحت لكن دي 100 خط برمجية عن برمجية بتفرق بمعنى إن محفظة زي Myetherwallet أو MyCrypto
بتديلك التحكم مباشرة فى عملاتك على المنصة أو بالمعني الأصح بتديلك صلاحية الدخول رقم 1 مباشرةً على عملاتك بدون أى وسيط بينك وبين عملاتك على الشبكة
أما المحافظ الباقية وبالأخص محافظ المنصات فالبرمجية عليها مش بتديلك صلاحية الوصول مباشرةً لعملاتك لأ فيه عامل وسيط موجود فى النص هو اللى متحكم فى عملاتك على الشبكة
بتديلك فقط صلاحيات معينة بس منها وهي صلاحيات بعيدة كل البعد عن التحكم المباشر فى عملاتك
فعلي سبيل المثال لما تحب تنقل عملاتك من عنوان لعنوان على شبكة البلوكتشين لازم تاخد تصريح من المتحكم بمحفظتك (المنصة) علشان كده إنت هنا رقم 2 مش رقم 1
– إزاى تعرف نوع المحفظة؟ وهل إنت متحكم فيها تحكم كامل (رقم 1) ولا التحكم الكامل مش معاك (رقم 2)
بكل بساطة الرد على السؤال ده بيكمن فى كلمة واحدة
الـ Private Key
اللى بيملك الـ Private Key للمحفظة هو اللى بيملك الصلاحيات الكاملة للمحفظة وده بيخلينا نتنقل لنقطة مهمة جداً
هل كل منصات التداول زي بعض؟
– أنواع منصات التداول
عندنا نوعين من منصات التداول مهم جداً إننا نعرفهم
1 – منصات تداول مركزية
مثال :-
Binance – Bittrex – Kucoin
وديه بتبقى إنت رقم 2 لأنك مش إنت اللى متحكم تحكم مباشر فى المحفظة بتاعتك لأنك مش معاك الـ Private Key وعلشان كده لازم تصريح من المسئولين فى المنصة قبل ماتقدر تنقل عملاتك منها لعنوان تاني
2 – منصات تداول لا مركزية
مثال :-
Etherdelta – IDEX – Forkdelta
وديه بتبقى إنت رقم 1 لأن المنصة بتطلب منك تربط محفظتك الخاصة اللى إنت متحكم فيها بالمنصة الخاصة بيهم مباشرةً
المنصة فى الحالة دي بتكون عبارة عن واجهة بتربطك بشبكة البلوكتشين وبتبقى إنت المسئول عن البيع والشراء مباشرة بدون أى تصريحات منهم سواء فى السحب أو الإيداع
الخلاصة:-
1- جميع العملات موجودة على شبكة البلوكتشين
2 – المحافظ عبارة عن واجهات برمجية فقط لربطك بالشبكة ولاتخزن العملات بداخلها
3 – لو معاك الـ Private Key للمحفظة فإنت متحكم فيها تحكم كامل (رقم 1) ولو مش معاك فإنت مش متحكم فيها تحكم كامل (رقم 2)
4 – منصات التداول نوعين مركزية ولا مركزية
5 – المنصات المركزية بتتعامل دائماً مع المحافظ من النوع (رقم 2) والمنصات اللامركزية بتتعامل دائماً مع المحافظ من النوع (رقم 1)
