ماجدة سيدهم تكتب : ماتعلمونا ياباشا

مقالات مشابهة

جهاد الكريسماس

‏5 ساعات مضت

صوم حر..

‏3 أسابيع مضت

علام تتنازعون

2 نوفمبر، 2024

طيب واحدة واحدة كدا يا باشا . إن كنت ناوي بجد تعمل تغير ماتنساش أهم وأخطر حاجة . سلوكنا اليومي .. خصوصا للناس اللي تحت اوي ..اللي زي حالاتي كدا يعني ..ولازم معاليك تعترف أن المجتمع اللي تحت ضايع وميت ..لازم حملة انتعاش للناس الغلابة ، وتجند له التعليم والإعلام والدراما ..كلها تتكلم وتطرح وتعلمنا سلوك جديد ..صدقني تاثيرها حايكون سريع وايجابي .ابدأ ياباشا ومن غير كسوف بالنظافة الشخصية دي في منتهى الخطورة …ايوه النظافة الشخصية ..اهم حاجة تبدأبيها

اولا علمني ازاي احب جسمي واحترمه واهتم به..احب الحياة لأنها بتاعتي ومن حقي ..

* علمني اغسل وشي كل يوم الصبح ( ناس كتير مابتغسل ) . .*أغسل اسناني بعد الاكل وقبل النوم والصبح ضروري جدا .. والمعجون وفره لينا ياباشا ….مش كلنا نقدر عليه .. *نظافة الأذن الضوافر مهمة جدا .. *تنتعطر قبل الخروج من البيت (اي ريحة بسيطة ).دا عنوان كل واحد فينا وهو خارج لعمله أو لمشواره …

*.نضحك في وش بعض .نتكلم بصوت واطي ..ناكل بدون صوت ..ناخد كميات تناسبنا ومانترك الطبق أو المكان ورانا عبارة عن فضيحة حضارية .. نتعلم أن الكلام أثناء المضغ عادة مقززة جدا ومثيرة الغثيان .. نغسل الخضار والفواكه قبل ماناكلها ..

*نغسل أيدنا باستمرار وخصوصا قبل الاكل …نغسل رجلينا ونعطرها .. وما نروح للنوم من غير نظافتنا الشخصية ..

* نلمع احذياتنا وكفاية لبس الشباشب في كل المشاوير والخروج بلبس البيت في الأسواق والشوارع خاصة في الأحياء المتواضعة …الفقر مش عيب لكن السلوك السيء والقذارة والاهمال هي اللي عيب لأنه عنوان شعب .

*نستعمل المناديل الورقية بدل هدومنا ..أو طرف الطرحة يقضي الغرض . ممنوع استخدام الأرصفة وتحت الكباري والانفاق لقضاء الحاجة أو البصق وغيره ..

* علمني ان الاستحمام كل يوم ضرورة ومهم جدا وكفاية عادة الاستحمام مرة ف الأسبوع أو مرتين دي مصيبة وتسبب امراض وروائح غير محببة خاصة في الصيف وخصوصا الستات مع كوم العبايات والهلاهيل والطرح من ألياف صناعية .. نغسل هدومنا باستمرار ولازم نخرج بملابس مكوية ونضيفة .

علمني أنه مهم نحط في شنطنا ازازة ريحة حلوة بسيطة ومراية صغيرة وقلم روج مهم جدا علشان نهتم بشكلنا ..مش عيب ولا حرام ..

علمني أنه من الأخلاق الراقية أن ارمي أي مخلفات في مكانها بالبيت أو الشارع ..

وحاجات كتير. لازم نتعلمها ..احنا بنتكلم بس في النظافة الشخصية ..في لسه حاجات ياما .ياما

* يافندم النظافة الشخصية مش رفاهية ابدا ..وما لها علاقة بالفقر أو بالغنا اطلاقا دي ثقافة وعنوان شعب .. علمني دا علشان أنا استحق اكون انسان نظيف وجميل ..

حطوها ضروري ياباشا في كل الكتب المدرسية درسوها ليل نهار لأولادنا ..نشوفها صبح مسا في المسلسلات والبرامج ..اكدوا عليها بتحفز وحب ..

صدقني دي افضل جدا من كل مناهج الدين و اهم من أي تعليم ممكن تأسس به طفل يشيل بلد بكرا ويشرفك جدا .

ياباشا احنا عاوزين نتعلم ..انت عاوز وناوي ولا ايه ….الكرة ف ملعبك ..