جريدة الأهرام الجديد الكندية 
مقالات مشابهة
بقلم اللواء دكتور : أحمد توفيق
حى مدينة نصر فساد على كل شكل ولون :
اولا: الفساد النافع
كنت اسكن منذ اوائل التسعينيات فى مدينة نصر بشارع حامد محمود بالمنطقه التاسعه وهو يقترب من شارع عبد العزيز عيسى الموازى لمصطفى النحاس ..وكان شارع مُهمل جدا فازرعنا فيه اشجار بالجهود الذاتيه وكذلك عانينا الامرين لانارته ..امامه مدرسه اسمها نبويه موسى تسبب لنا زحام رهيب مما اضطرنا لركن السيارات على رصيف الجزيره الوسطى للشارع.. حى مدينه نصر ليس علاقه بشارعنا من قريب او بعيد ..كوكب تانى لمؤاخذه..ولكن ومع الوقت بدات العمارات الكبيره تظهر فى الشارع بسكان جدد .. وفجاءه بالامس وجدنا حى مدينه نصر شرق يصحو من ثباته العميق ويحضر 3 لودر كبير تجرف الجزيره الوسطى بالشارع ومسؤلى الاناره والارصفه والرصف خلية نحل بالشارع !!!!!!؟؟ بيكسروا الاشجار المزروعه فى الجزيره الوسطى بدعوى توسيع الشارع وتضيق الجزيره الوسطى ورصف الشارع وتركيب بلدورات رصيف جديده ونقل اعمدة الاناره !!!!؟؟ يا نهار الواااان كل ده مره واحده وعلى فجاءه كده ؟؟؟!!! ايوه ضرورى لانه بالسؤال وجدنا انهم اخذوا تعليمات من السيد وزير التنميه المحليه …وزير التنميه بنفسه؟؟ايوه بنفسه…طب كنت فين من زمان ؟؟؟؟؟؟ وجاى تدور على شارعنا الداخلى ؟؟وعرفنا اللى فيها..
انه حد مهم سكن بالشارع .. وهذا مايسمى الفساد النافع
لانهم افتكروا شارعنا بعد ما سكن فيه حد مهم..وغير كده كنا حانفضل منسيين…
ثانيا: الفساد الضار
طيب وبالنسبه للفساد الضار العلنى الواضح زى الشمس فى الشارع اللى قبلنا اللى بيننا وبينه 10 متر والمسمى عبد العزيز عيسى اللى على ناصيته كافيه واخد الرصيف كله لحسابه و عامل اعمده حديد ومسقفها كمان وواخد الرصيف بالكامل وواخد راحته على الاخر وكأن الشارع بتاعه؟؟
بهوات الحى قالوا مالناش دعوه احنا جايين لشارعكم فقط !!؟؟؟ طب وبالنسبه للمخالفات الفاجره فى الكافيه وايضا للحديد الموجود فى شارع عبد العزيز عيسى امام جميع العمارات وفى نص الشارع…؟؟؟! برضوا ملناش دعوه احنا جايين بأمر الوزير لشارعكم..!!!!؟؟؟.هكذا قال احد الموظفين بالحى ونهره زميله وزعق له وقال له دى خطه تطوير تطوير شارعنا بس انما المخالفات فى شارع عبد العزيز عيسى والكافيه وحديد امام العمارات اللى على مسافه 10 متر من شارعنا خارج التطوير !!!؟طبعا كافيه سى السيد (ده اسمه مش هزار) جامد جدا ومظبط الحى …منتظرين لما حد يتقتل فى خناقه فى الكافيه عشان يقفلوه كالمعتاد. والمضحك ان سيارة شرطه واقفه امام الكافيه عادى ملهاش دعوه…هذه هى حدوته شارعنا وما حوله واعتقد ان شوارع كتير بنفس الحال لكن معندهمش قريب وزير او حد مهم ومعندهمش سى السيد بتاع الكافيه….
هى دى محليات مصر يا عبلة …
• اللواء الدكتور / أحمد توفيق – أستاذ إدارة الازمات بالجامعة الامريكية
