جريدة الأهرام الجديد الكندية 
مقالات مشابهة
الحكاية جنون فى جنون
و المسيحى مالوش دية
لا محبة ولا حتى قانون
نافعين فى البلد ديه
طعم الظلم يا ناس عنيف
افتحوا الكنايس حرام
رد ربنا و الله مخيف
كفاية بقى إجرام
أخ مسيحى اشتكالى
قالى مش عارف اصلى
يرضيك يا مسلم حالى
ليه ساكت عللى بيحصلى
الكنيسة بابها مسدود
و الاقفال محدش كاسرها
مهما كانت قوة القيود
ربنا وحده بكرة ناصرها
هية الكنيسة قفلوها ليه
أصعب سؤال اتسألى
معرفتش أرد عليه
قالى انا عايز أصلى
قولتله صلى فى الجامع
و خلى كمان صوتك عالى
قالى لما صليت فى الشارع
محدش سابنى فى حالى
احنا اخوات ازاى
ولا هو كلام فى كلام
لازم بكرة الجاى
يبقى كله سلام
المسيحى مش عارف يصلى
ولا لاقى لصلاته مكان
هو ليه مضطهد تملى
ولا حاسس بأى أمان
المسيحى شعره شاب
من كتر الظلم اللى شافه
اضطهاد و ظلم و عذاب
ولا حتى انكسر مجدافه
الكنيسة قفلوها بضبة و مفتاح
و انحط على الخبر ماجور
و الكنيسة لا فيها سلاح
ولا تعرف اى شرور
كلمات : محمد فتحى
