جريدة الأهرام الجديد الكندية 
مقالات مشابهة
بقلم : حماده الفرا مصرى بالسعودية
الجملة دي قالها عامل مصري كان عصبى وعايز يعتصم هو وزملائه فى السفارة علشان حد يحل له مشكلته ، فتم تهديده أولا بضابط الأمن ، وبعد ذلك ارسلوا له أخونا اللي قاله أنا رئيس الجالية بالسعودية ، وسأقوم بحل مشكلتك، فالعامل البسيط بتلقائية قاله انت رئيس جالية على نفسك….
افتكرت الجملة دي وأنا بكتب موضوع عن العمل العام في الجالية ورجالات العمل العام
فكل من قام بمساهمة تطوعية ولو بسيطة يظن في نفسه أنه رئيس جمهورية الجالية ومن حوله يزكون هذا الإحساس لديه ويقع الجميع في فخ انتفاخ الذات … ولكن يشاء القدر ووجدنا نحن لتفسية – لمؤاخذة – هذا الإنتفاخ
في المقال ده هصنف ليكم نشطاء العمل العام في السعودية :
الناشط الحركة : أيوة انت قريتها صح هو لا ليه في خدمة ناس الجالية ولا يحزنون تطلب منه تجميع تذكره طيران لحالة فلا تجده … زيارة للتوقيف مش معاكم ….فوتوسيشن في حفلة السفارة تلاقيه طالع في 100 صورة من أصل 70 .
الناشط البركه : وده تلاقيه جدع وكل حاجة ومخلص بس ممكن يشتغل عمل عام في وقت فراغ الفراغ مش متابع لاغلب الحالات بس لو قصدته هتلاقية ولو مدورتش عليه بتكليف لحالة معينه يختفي سنة .
الناشط الحساس : ده ناشط في الجالية بس بينشط قوي لما يقرى عن حالة مؤثرة لعائلة أو شخص ومينامش الليل ويكلم كل الناس ويشتم كل المقصرين والمسئولين ويجيله اكتئاب ويختفي باقي السنة .
الناشط الإمعة: وده متشفوش في عمل لوحده لازم يكون تابع لسيده و وتلاقيه لامؤاخذة يكرر كلامهم … لو كلامهم ان العامل هو مخطئ يبقى العامل هو المخطئ والسفارة حلوة ..
لو الحوار أن السفارة مقصره والعامل مسكين يبقى يشتغل على النغمة دي .
الناشط المنظر : أيوه هو أبو كرافته حلوه ده بينشط في الجالية لما بيكونوا بيكرموا حد تلاقيه فاتح بؤه فى الصور أو لما يكرموه ها ( على أيه معرفش ) وده محتفظ بألبوم صورليه مع السادة المسئولين وفي فترة ركود حفلات السفارة يشتغل على الذكريات التى يرسلها له مارك على الفيس بوك .
ناشط الموائد : وده شوية تلاقيه مع الحزب الجمهوري وبيشتم في الحزب الديمقراطي وبعد شوية تلاقيه قلب العكس والناس في الجالية لا تستطيع الإستفادة منه بأى شىء بالعكس قاعد يشوه في الناس الصح ويشتم وخلاص .
الناشط الطبال : وده مع أي مشكلة في الجالية شغلته يشيع بين الناس انه كلم السفارة والموضوع اتحل وهو مبيتصلش أصلاً شغلته يهبط الناس ويطبل للمسئول وخلاص …وبعد أسبوعين ثلاثة الموضوع يتحل بجهود الطيبين يقولك مش قولتك السفارة عندها علم وأنا كلمتها ؟
ولو المياه في عمارتنا قعدت أسبوع مقطعتش يكتب منشور يشكر فيه السفير ووزيرة الهجرة .
ناشط الألتراس : ودي ظاهرة جديدة في الجالية تلاقي فيها الناشط في أول لقاء في السفارة يقول للمسئول أنا شبح سعادتك
والناس اللي تبعي كتير … لوجيستك حفلة تلاقي لوجيستك تكريم تلاقي عندي شباب هاي كلاس وبنات فورمال صف أول وعائلات بدون أطفال ومطربين وهننزل بشعراء ومداحين قريب.
ناشط المخابرات : وده مع كل مشكلة في الجالية يقولك لسه قافل مع ضابط كبير في المخابرات المصرية وقالي الوضع السيطرة والموضوع كله مع المخابرات والسفير اللي طلع معاش بعد اتنين وستين سنة خدمة – بيني وبينك –المخابرات هيا اللي شالته.
الناشط المؤدلج : ( محدش يفهم اني بتكلم عن نشطاء الإخوان ) هتستغرب لو قولتلك أنهم جدعان وحمالين أسية ويجيبولك حل من تحت الأرض ….بس عيبهم لو دخلت معاهم فى أي انتخابات جالية طريقتهم ( عبده سيطرة ) .
الناشط الحقيقي : وده الجالية المطحونة هيا اللي تعرف قدره وبيوهب وقته وجهده للعمل العام بإخلاص وأول مايجيله تليفون عن حالة يجري عليها ويشتغل بالموضوع ويتصل هو يكمل مع الحالة ودول كتير وبيشتغلو بعيد عن الضوء وشايلين حمل كبير ومتعرفش مين في لجان خيرهم بس بتشوف نتائج حلوة من غير صور على فكره .
في نهاية المقال لازم أعمل تنوية نسيت أعمله في أول المقال …. هذا المنشور هزلي غير حقيقي غير موضوعي وغير محايد والأشخاص به خيالية ولا تمت للواقع بصلة واي تشابه بينة وبين الواقع فهو اغرب من الخيال
