ماجدة سيدهم تكتب : بالبلدي كدا

مقالات مشابهة

علام تتنازعون

‏أسبوعين مضت

الهدم يبدأ من التعليم ..الجريمة الوقحة

‏3 أسابيع مضت

نصف الحق يعثر الكثيرين

‏3 أسابيع مضت

هي لما عيّلة مسيحية تجبر على الأسلمة وتتجوز عيّل ..دا يمثل انجاز خطير للدرجة دي ويحقق أهداف عليا مثلا في مسيرة التاربخ المتخلف للهوس بالدين ..(جتكوا خيبة )

ياعمي وار د جدا وطبيعي ف السن دا يحصل ميول بين الجنسين ويحبوا بعض ..دا طبيعي جدا ..أو حتى العيّل دا ميل عقل البت العيّلة دي بكلمتين.. بيحصل في كل الدنيا …والعيال الصغيرين دول اللي هم مراهقين أو أصغر مش فارق معاهم حسابتنا خالص حتى لو صرخنا ليل نهار ..

لكن علشان احنا فشلة ونعاني من جهل وانحطاط وسفالة وهوس ديني وجنسي مالوش حل ..

.نقوم نعمل إيه.. نطلعها ف دماغ العيل انه لازم يجيب البت ويخليها تسلم ..وشرط انه يكون سواق توكتوك ..مش عارفة ليه يعني صراحة ..(يمكن السر في شكل التوكتوك مثلا ..ماعلينا )نقوم نطلعها ف دماغة ..ويروح يزن عليه شيخ الحتة الجاهل والفتونجي بإن البت القبطية دي حلال عليه وان دينه ..اللي هو عمره ماسمع عنه أصلا .. بيقوله إنه بكدا حقق نصرة وفتح مبين وميزان حسناته يادين أمي حايقع من تقله ..دا غير الفلوس والزفة بالاعلام الخضرا ..وتكوكتوك جديد بشخاليل ..ولأول مرة حايلبس جزمة ..على فكرة العيال دي كلها مساكين بجد ..عيال من مناطق معدمة ومقهورة وميتة أصلا وخارج دماغ الدولة أساسا ..

خش بئا يامعلم على المتعوسة الغلبانة ..أنا مابلومهاش لأنها غلبانة ومش حمل كل الكلام والرغي والتهديد والاغراءات ..دول حوش وملاحقينها ياحول الله حتى تقول إيه ..حرام بجد نسن لها السكين. ..أو نقول كلبة وراحت لأنها عيلة .. ومش مدركة دا غير الرعب والوحدة اللي هي فيها.. (الكلبة دي ..جريمتها إنها يمكن تكون حبت أو اندفعت أو حتى غلطت ..لكنها عيلة ..والحوش والهمج ملاحقينها ..لكنها غالية اوي على قلب أبوها اللي فوق ..ماعلينا برضه )..

المتعوسة دي يفضلوا يزنوا في ودانها ان :اهلك دول كفرة ..أبوكي وأمك حايخشوا النار وإن دين جوزك العيل دا هو الصح وحاتروحي الجنة تاكلي تفاح ياما وخوخ ومش بعيد كيوي كمان (جتكوا ستين وكسة ) انسي اهلك خالص ..احنا اهلك ..شوفي الدهب واللبس الحلو دا….طيب شوفي الزفة على الحصان علشانك ياعروسة .. عارفة لو روحتي لاهلك حايدبحوكي ..طيب عا رفة لو رجعتي عن اسلامك احنا اللي بئا حاندبحك ..إنت كدا بتر ضي ربك وجوزك العيل أبو توكتوك دا ..

الله عليكي ف الحجاب ..سترة . .نور على نور وسمعونا ذغاريد يانساوين الحتة ..(اذا كان يامحترم البنات اللي بتفهم دلوقت بتخلعة. حا تذغرطوله انتو ..جتكوا ستين على ستين وكسة ) .ماحدش يفتح بؤه ويقولي اسلمت بمزاجها والفيديو اهو ..

ماعلينامن ام الليلة السودا دي ..م الاخر اللي فارق معايا إنهم عيال..ضحايا . .يعني لو شباب كبار وواعين ومثقفين و من عائلات فاهمة كدا حانقول فاهمين و مدركين واختاروا حياتهم ومبروك عليهم ومافيش مشكلة ..كل واحد حر ..ودي حياتهم ..

لكن يابا الحج دول عيال ..يعني انت دمرت اتنين ..دمر ت عيلة وحرقت قلب اهلها عليها ..وأوعي تفكر انها حاتنسي حضن أمها أو طبطبة ابوها (حتى لو اهلها وحشين ..برضه اهلها ) لكنها مرعوبة ومشتتة واتقفل ادامها كل الأبواب .. الا باب ربنا ..

وكمان ياغبي ياجاهل انت دمرت حياة عيل وخليته مجرم وبلطجي ويشوف إن كل مسيحية هي كافرة ونجسة ورخيصة ومشروع اسلمة جديد ..وبكره وحياة أمي حايكون داعشي على أصوله ..وبتوكتوك برضه ..

لو احنا في دولة دكر ..كانت لمت الواغش دا كله ف ساعة زمن لو احنا في بلد فيها قانون تعرف ان دي مشكلة اجتماعية تتحل بسهولة جدا ..دا شغل عيال .. نشيل دا من دا .. ويادار ماخلك شر.. ونفضل حبايب

. لكن اعمل نفسي من بنهاااااا واحولها لقضية دينية طائفية واسيب الغوغاء والواغش والرعاع ..يفتوا ويتصرفوا وبعدين اطلب اختى لواحظ وفاطنة واجيب بيت العيلة ولجنة حكماء .. (حكماء ايه ؟كانو نفعوا في حل الغرقة السودا لحال البلد المايل لما يفلحوا ف حل مشكلة واد وبت ..جتكوا الف وكسة على وكستكوا …) دي جربمة في حق الوطن والمجتمع كله

عموما إن كان دا انجاز فدا عار عليكوا أوي ان يكون هدفكوا عدد في التراب ..بلاش العدد ف الليمون لأنه غالي .. والأدمغة دي ماتسواس غير تمنها تراب ..

إنها ياعزيزي مرحلة الوكسة المركبة .. افعل ماشئنت أنت تعيش الغوغائية ..