جريدة الأهرام الجديد الكندية مقالات مشابهة
اشتريت البيت ..كل الناس نبهتني أن التمن غالي أوي وحذروني ان البيت مهجور من سنين ومسكون كمان ..وأكدوا أنهم دايما بيسمعوا فيه أصوات مرعبة وبيشوفوا نار طالعة ومرات لاحس ولا خبر ..
حقيقي البيت مهول.. كان زمان قصر فخم ..بتاعنا .. الشبابيك كلها مقفولة ..البوابة الحديد الخارجية ضخمة جدا وعالية اوي عليها غبار ونقوش غريبة . ماخبيش عليكوا كنت مرعوبة .. ماكنش ادامي حل تاني وأنا مرمية في الشوارع مع عيالي وبيتنا الاصلي ساكنه اشباح واغراب ..
سميت بسم الله ..مااقلكوش على كمية الطوب والزلط ..خرابة بجد ..دخلت البيت ..ياساتر على الريحة ..ظلمة ورطوبة بالظبط ريحة كمكمة وصوت خروشة ..بجد كنت خايفة جدا . حسست الطريق ما انا حافظة المكان لحد ماوصلت للشباك ..حاولت افتحه ..يا نهاري على التزييئة ..وانا يادوب فتحت الشباك ودخل النور وعينكوا ماتشوف الا النور ..اقسم بالله كمية الفيران والصراصير والعرس والوطاويط ..انا كان قلبي حايقف من المنظر والرعب ..كله هرب واستخبي في المواسير والشقوق ماعدا الوطاويط فضلت تخبط وترزع في الحيطان بغشامة لانها مابتشوفش في النور .. فتحت الشباك التاني والتالت يهوي المكان ..دخلت الغرف كلها ..كراكيب وصناديق واقفال وورق قديم ..الارضيه بواقي اكل على براز على جثث عفنت ونشفت وخشب قديم ومسامير وفوارغ كتير ..مش عارفة امشي ..امال لوفتحنا كل الشبابيك حايحصل ايه ..الحق الموضوع كبير ..
كان لازم اتصل باهل حتتي ..جم ..وبدأنا نلم.. خرجنا كمية زبالة مستحيلة ..شغل طحن ليل نهار ماشوفنا نوم ولا راحة ..يادوب بنلم زبالة بس وبنضف من أثار العيشة السودة والفوضى دي ..لكن كان لازم نشيل البلاط الملطخ كمان .. كله مخوخ ..ونشيل النجف المطفي كله ..
وهمينا كدا ويالا بسم الله.. وعلشان الشغل يهون شوية جبنا كاسيت وشغلنا شوية اغاني تحفزنا .. وما احكيلكوا على السواد لما شغلنا أغاني ..فجأة سمعنا صوت صراخ وعياط ولطم وخبط من كل حته …دا صوت الأشباح . وبعدين ياولاد هو احنا حا نخاف ..خلاص بدأنا .. رحنا فتحنا كل الأبواب. ووسعنا مساحة الشبابيك . .وبدأنا نرفع البلاط كله ..كان بايش على الآخر بيطلع بسهولة معانا ..ويالهوي على التعابين اللي كانت تحته مستخبية ..أشكال واحجام .. اللي عامل نفسه ميت واللي عمل جدع وراح يبخ في وشنا ..الانكي اللي راح يرقص على الأغاني ..لا ياعسل انت حاتصاحبنا ..ولا فاكرنا حانصدق .. اخرك تعبان ..التعامل مع التعابين صعب جدا ..
.شيلنا البلاط كله والخشب المسوس وكحتنا الحيطان كلها .. ماخلينا تعبان ولا صراصار ولا عنكبوت في زاوية ولا ركن ..البيت دلوقت أصبح على اساسه بس..ولأول مرة رنت ضحكة عالية ..دخلنا على السنفرة والتلميع ..والبنا على نظافة ..ياهوووووو.. الصحي والكهربا ودخلنا على المحارة والبياض والسيراميك ..بدأنا نشترى الأثاث مودرن على كلاسيك وحاجات كتيرجدا قديمة مافرطناش فيها ابدا دي فخمة جدا زي الالات الموسيقية كلها والملابس والمكتبة واللوحات وادوات طبخ واحتفظنا بالفرن القديم .. عنينا ماشافت نوم ..بس كنا فرحانين بالنتيجة..
..دخلنا على شغل الجنينة ورفعنا منها كل الزرع الميت وزرعناها من جديد ..تكعيبة العنب دي أهم شجرة..الرمان والتين والبرتقال وخضار كمان ونباتات زينة وريحان.و..و. ..عملنا مرجيحة كبيرة وحمام سباحة وممشي ..
تصوروا البيت من جوه بقى واسع جدا رغم انها نفس المساحة ورنة الضحك بترقص الجدران
دا مش حلم ..دا حقيقة ..حاشتري البيت . .اشتريت البيت .دفعت التمن غالي واشتريته ..حادفع التمن أغلى وحاشتريه .. ببساطة لأنه بيتنا ..وطنى ..
