جريدة الأهرام الجديد الكندية 
مقالات مشابهة
أكد أحد الشباب المصرى ويدعى أحمد أنه استطاع التوصل الى الجندى المصرى الذى ظهر فى فيديو داعش
والأهرام تنقل لكم ما قاله هذا الجندى على لسان الشاب
واليكم التفاصيل كما سردها الشاب دون تدخل منا
تركيز تاني بعد اذنكم البوست ده مهم جداً للناس اللي شافت البوست اللي فات , فاكرين البوست اللي نزلته من كام يوم اللي جبت فيه صور من فيديو داعش الأخير لجندي بطل ولحظات اطلاق النار عليه وثباته وقولت انه استشهد ..
خلال الأيام اللي فاتت ناس بعتتلي انه لسة عايش وبخير وماحبتش اتكلم في اي حاجة غير لما اتأكد من المعلومة دي 100% والحمد لله اتأكدت ووصلتله شخصياً واتكلمت معاه كمان هو الحمد لله بخير وبقى أحسن وكل حرف هقوله “عنه” في البوست ده والصور واخدها منه شخصياً وبأذنه.
جندي مقاتل بطل “محمد مصطفى عبدالله”
محمد خريج كلية تجارة جامعة المنصورة اتخرج والتحق بالخدمة العسكرية.
مبدئياً الفيديو حصل عليه تنظير وكلام وهري كتير من ناس بتكذب الفيديو وتقول انه مفبرك لناس بتنظر وتقول انه مش متدرب كويس وبتدينه عشان خرج من مكانه وحاول يضرب فالحمد لله اللي جعل البوست اللي فات سبب اني اوصلله واقدر افهم جزء حتى لو بسيط من الحقيقة حتى لو لنفسي رغم اني اتمنى ان كل الناس تدور وتفهم وماتتكلمش وخلاص فالبوست ده هيكون رد ع الناس اللي قالت انه مش متدرب ورد ع الناس اللي قالت ان الفيديو مفبرك وتكريم بسيط ليه ان الناس تعرف ان في رجالة في بلدنا مجهولين بتضحي عشان البلد دي ليل ونهار وناس كتير مش حاسه ..
الفيديو كان بيظهر محمد وهو بيطلع من تحت السلاح ويمسكه ويبدأ يصوب وفي اللحظة دي بيتم اطلاق النار عليه , محمد لما اتكلمت معاه فالنقطة دي وبسأله عن سبب وقوفه وانه يمسك السلاح تاني رغم انه كان بيتضرب عليه وكان ممكن يفضل تحت ومايطلعش لحد مالضرب يوقف وده موقف طبيعي مش حاجة غلط يعني , قالي لأ انا كنت محدد الهدف وعارف مكانه ولما نزلت تحت كنت بشد أجزاء السلاح وكان ممكن ابلغ حد يتعامل مع الهدف بدالي بس كان صعب اوصفله مكان الهدف تحديداً اللي بيضرب عليا فانا عشان كنت عارف مكانه ومحدده فقررت اقوم واتعامل معاه بنفسي.
محمد لما بقوله ان المشهد بتاعه اثر فيا جداً وفضلت اعيد فيه كتير بسبب نظرته وتعبيرات وشه في الفيديو قالي انا نفسي اتأثرت لما شوفت المشهد ده وقالي على فكرة دي مش اول مرة اواجه موقف كدة وبنواجه مواقف زي دي يومياً وبنتصدى ليها وبنتغلب عليهم خصوصاً لما بيكون في اشتباك مباشر لكن اللي اطلق عليا النار كان في وسط قرية ومن مسافة بعيدة جداً مش قريبة زي ما الكاميرا مبينة وهي دي الطريقة اللي بيوصلولنا بيها عشان مابيقدروش يواجهونا مباشرةً, سألته تاني ايه رأيك في الناس اللي بتتكلم ان الفيديو مفبرك لما بتسمع الكلام ده بتحس بأيه , قاللي شوف انا بتضايق من الناس اللي مش فاهمة وبتتكلم بس بالنسبالي انا مفيش مشكلة انا بتضايق وبفكر بس في زمايلي اللي بيموتوا وبيصابوا وبحس ان حقهم بيضيع لما ناس تشوفهم بيتضربوا وتقول انه مفبرك رغم انهم واقفين بيحموا الوطن وعلى فكرة هما لما بيجروا مش بيجروا خايفين هما بيجروا عشان يبلغوا او يلحقوا يتعاملوا لأن اوقات بيتضرب عليهم وهما بيصلوا مثلاً او في اوقات زي كدة فلازم يجروا بعيد عن الضرب مش اكتر لحد مايجهزوا نفسهم للتعامل.
أنا مبسوط جداً اني اتكلمت مع محمد واتطمنت عليه محمد مصاب بشظايا في الوجه والعين أثرت على النظر , خرج قريب من المستشفى وبيتلقى العلاج في البيت فياريت كلنا ندعيله ربنا يتم شفاه على خير هو بيقولي عندي استعداد ارجع وأقف في نفس المكان تاني واخدم الوطن.
المهم انا هنهي البوست ده بنفس الكلام اللي نهيت بيه البوست اللي فات , ناس برضه قاعدة في تكييفات وبتقبض ملايين وبينظروا وبيهروا وبيضيعوا حقوق أبطال بتضحي عشاننا وعايشة وسطنا وبيضيعوا علينا حتى فرصة اننا نعرفهم .. بيهروا في ان الفيديو مفبرك وكأننا مش عارفين او مش بنسمع كل يوم عن اخواتنا اللي بيستشهدوا في سيناء , تكذيبكم للفيديو بيحسس الناس ان الفيديو فيه هزيمة عشان كدة لازم نكذبه .. لكن لأ الفيديو مش مفبرك وفي أبطال حقيقية وقفت قدام الارهابيين وواجهتهم ولسة في أبطال واقفة هناك مابتنامش مابتطلعش تقول كلمتين ع الهواء وتروح تنام في السرير وتقبض عليهم ملايين ناس واقفة حرفياً مابتاخدش حاجة غير المتاجرة بيهم منكم ومن غيركم , انا حاولت اقرب من الحقيقة عشان اعرف حتى لو جزء بسيط منها وانا الحمد لله راضي عن الجزء اللي وصلتله لحد دلوقتي , فماتنسوش ان لسة ابطال مجهولين كتير وماتنسوش تدعوا لمحمد بالشفاء وتدعوا لكل الأبطال اللي بيخدموا الوطن بجد ربنا يثبتهم وينصرهم ويحميهم وينتقم من اللي بيقتلهم وبيتاجر بيهم.
