جريدة الأهرام الجديد الكندية 
مقالات مشابهة
جمال رشدي .
بفكر وحزين وقاعد زعلان على حال مصر. أول مرة اخاف بالشكل دا على البلد. رغم الارهاب والفساد والجهل والمرض والناس بتصرخ من المعيشة لكن ابدا مكنتش خايف كنت بقول أزمة وتعدي اول ما شفت موضوع العويسات وشباب الأقصر عاصمة ثقافة العالم ومركز الاصالة في الصعيد وهما محوطين بيت البنت علشان ياخدوها ضربت كف على كف وقلت منه العوض وعليه العوض مش علشان البنت لكن علشان مصر. تليفوني المحمول رن . الو. صوت جهوري من تليفون ثابت. جمال رشدي معايا. ايو يا عم مين غير جمال في أيامنا الزفت دا. ضحك الراجل وقال طيب اعرف مين معاك الأول قبل ما تقول الايام الزفت. قلت له مين يا سيدي متكنش السيسي. قال فعلا انا من الرئاسة. وبتصل بك علشان تيجي تقابل الريس بكرة. سكت شوية وقلت له انا مش ناقص تهريج قال ابدا يا فندم انا فلان الفلاني انت عرفني شخصيا قلت له انا مش أصدقك غير لما تكلمني من محمولك رقمك مسجل عندي ضحك وقال حاضر يا صعيدي. اتصل من المحمول لقيت فعلا الظابط فلان صاحبي قلت له يخرب عقلك الموضوع بجد. قلت له بلاش اقابل الريس بكرة علشان انا زعلان منه وانت عارفني صعيدي مقفل وعلشان مخبطش معاه في الكلام. قال لي مش هينفع نأجل المقابلة. قلت له وأنا مش عاوز اقابله لاني محروق منه وزعلان جامد.. الظابط قا لي بلاش مخك الصعيدي. قلت له الله يخليك حل عني انا مش ناقص هم. المهم قفل الظابط معايا التليفون وبعد خمس دقايق رن عليا مدير مكتبه الواء عباس كامل. الو نعم معاك عباس كامل مدير مكتب الريس. اهلا وسهلا عباس بيه.. من فضلك ضروري غدا الساعة 3 تكون في الرئاسة انا صمت ومعرفتش اقول ايه.. قال لي غدا صباحا سوف تحضر لك سيارة إلى المنزل تأخذك للرئاسة تنهد وقلت أمري لله. تاني يوم سيارة جب كبيرة وقفت على رأس الشارع عيل صغير جه يجري عمي جمال كلم برة ناس بتسأل عليك. لبست جلبيتي الصعيدي وركبت معاهم العربية. على الساعة ثلاثة كنت أمام الاتحادية. لقيت الظابط بلدياتي منتظرني أول ما شافني ضحك وقال وحشتني مردتش عليه قال لي مالك قافل ليه قلت له مليش نفس اضحك ولا اتكلم انا محبط. قال استنى ريح شوية من الطريق وبلاش تدخل كدا على اتعصبت عليه قلت له يا سيدي انا راجع ومش اقابل الريس ولا غيره وأول ما صوتي علي لقيت ظابط جه من جوا القصر وقال اتفضل جمال بيه الريس منتظرك لقيت نفسي اتعصبت على الظابط أيضا وقلت له لا بيه ولا زفت انت مش شايف الجلبية الفلاحي ال انا لابسها. ابتسم الظابط وحاول يستوعبني كل طقم الحراسة مراقب غضبي وتصرفاتي دخلت جوه مع الظابط لقيت نفسي قدام مدير مكتب الريس استقبلني بابتسامة هادئه تقريبا كان شايف صورة غضبي مع طقم الحراسة جلست معه حاول يحكي معايا. قلت له ميعاد الريس معايا عدي قال لي الريس منتظرك لكن ماقدرش ادخلك عليه وانت في هذه الحالة قلت له خلاص بلاش اقابله ووقفت علشان امشي لقيت تليفون مدير مكتب الريس رن بعد ما رد عليه قال لي اتفضل الريس منتظرك جه واحد متجهم في شكله وقال اتفضل بصيت له وقلت في قرار نفسي دا يوم مش معدي ربنا يسترها. مشيت معاه جوه لقيت إعلام مصر منكسه وكأنها حزينه وفي حالة حداد. فجأة لقيت نفسي أمام الريس وقفت شوية صامت قبل ما اسلم عليه هو لاحظ ومكتبة نقل له أنني متعصب وغضبان. بابتسامته المعهودة قال اذيك ياصعيدي قلت له إذيك يا ريس لقيته اخذ خطوتين ومد ايده سلمت عليه ضغط على أيدي جامد وقال أهلنا في الصعيد عاملين ايه مردتش عليه بصيت في عنيه حسيت بهموم وتعب كتير حضنته لقيت أنفاسه كأنها لهث في سباق جرى.. صعب عليا.. غضبي خف شوية قال أهلنا في الصعيد أخبارهم ايه قلت له يا ريس انا مكنتش عاوز اقابلك لاني زعلان منك وانا صعيدي ومدب في كلامي ومش عاوز ازعلك. ضحك وقال اتكلم براحتك وقول لي زعلان ليه سكت وبصيت له. قال انا عارف ان ظروف الناس تعبانه وعارف أن في فساد وتطرف وجهل لكن عاوز اسمعك قلت له مش مشكله الجوع ولا الفساد ولا التطرف ولا المرض. انا مش زعلان من كدا انا حاسس ان مصر بضيع من بين أيدينا. لقيت ضرب ميه وحداشر وقال لن يستطيع أحد أن يمس مصر. قلت له يا ريس مصر في خطر قال لي تقصد ايه قلت له شفت مصيبة امبارح في الزقازيق بنت ماشيه في حالها أجمع عليها مئات الشباب علشان يغتصبوها مفيش واحد عنده نخوة في الشارع يدافع عنها.. شفت العويسات في الأقصر يا ريس. الأقصر يا ريس عاصمة الثقافة في العالم. الصعايدة يا ريس النخوة والرجولة مظاهرة شباب يا ريس عاوزين ياخدوا بنت بالعافية من أهلها واتهجموا على بيوت ناس غلابة ومسالمين مفيش حد كبير منعهم وقال لهم عيب. مصر بتضيع يا ريس شفت الست ال كانت ماشية في الشارع وواحد كان عاوز يدبحها. شفت يا ريس المصيبة الكبرى واحد اغتصب بنت عندها سنتين… ولقيت نفسي انفعلت وصوتي على بقول له اتحرك قبل ما نروح في داهيه. فجأة لقيت ظابط جه وأعطى ورقه صغير للرئيس ونظر ليا نظرة غضب وتهديد. طبعا قلت في قرار نفسي خلاص روحت في داهية. يوسف ابنك مش هيشوفك تاني يا جمال. الريس لاحظ شعوري شاور بيده مشي الظابط وقال لي اتكلم براحتك ولا يهمك شيء. طبعا تجرأت واطمنيت..بص لي بنظرة رجل المخابرات وقال كمل. قلت له يا جنرال بطريقة عفويه ابتسم وقال كمل ياصعيدي ضحكت وقلت والله شكلي مش اشوف الشارع تاني قال لي اطمن. قلت له ازاي والظابط عشماوي كان بييبص لي وعنيه فيها شرار.. ضحك بصوت عالي وقال قصدك العميد طه. فجأة لقيت العميد طه في وسطينا ابتسم ابتسامة خبيثة وقال ابدا يا جمال بيه انت ضيف عزيز علينا. قلت له ربنا يستر انا مش مطمنلك الريس ضحك وقال يا طه اترك المكان.. مشي طه. الريس قال انا عاوز اسمع رايك في بعض المشاكل وكيفية حلها. قلت يا ريس انت عاوز الجد ولا لا ابن عمه ضحك ضحكة من قلبه وقال انا عاوز الجد الصعيدي. قلت له انت ضيعت فرصة ذهبية على نفسك وعلى مصر صمت وكأنه عارف أقول ايه قلت له من البداية الشعب المصري كان معاك كان لازم تعمل حاجتين اولا تطبيق قانون الطوارئ ومحاكم عسكرية فورية على الفساد والتطرف والفوضى ثانيا إسناد التربية والتعليم إلى لجنة من علماء مصر برئاسة وسيم السيسي ومعاه حلمي نمنع وطارق حجي وإبراهيم عيسى يا ريس المدارس مسخرة التلاميذ بيبهدلوا المدرسين سن قانون يعطي حصانة للمعلم. ياريس انا خايف على مصر. رجع أمن الدولة تاني. البلد سابت مفيش ضبط ولا ربط وفجأة بقدرة قادر لقيت الظابط طه في وسطينا بيقول للرئيس خلاص ميعاد المقابلة انتهى. الريس شاور له بيده يمشي. كملت كلامي وقلت انت رايح أمريكا يا ريس خلال يومين بالله عليك بلاش نخنع ولا نركع تاني ل أمريكا مش مشكلة نجوع لكن عاوزين نبقى بكرامتنا حسني مبارك باع مصر وودانا في داهية. ابتسم وكأنه يريد أن ينهي اللقاء وقال لي اطمن على مصر.. قلت له محاكم عسكرية والمنهج يا ريس.. قلت له انا كاتب دراسة من زمان تعالج مشاكل مصر. الاسبوع ال فات فوجئت انهم أخذوا فكرتي من الدراسة. مجلس استشاري لكل محافظة من اولاد المحافظة. بص لي وقال لنا لقاء بعد الرجوع من امريكا. وبصوت عالي قال ياااااا طه. اتصلوا برئيس الوزراء يتم إصدار قرار بتعيين جمال رشدي وزيرا للتعليم وانا واقف وبسلم على الرئيس علشان أنهى اللقاء.. لقيته شد على أيدي جامد وقال ابدء عملك واتصل ب وسيم السيسي والنمنم وإبراهيم عيسى.. بصيت في عنيه لقيت مصر زعلانه وحزينه قلت له سلام يا جنرال…. وفجأة لقيت يوسف ابني بيصحيني من النوم ويقول بابا بابا بابا قوووووووم اتخانقت في ناظر المدرسة وعاوزك بكرة ضروري.. وكالعادة صحيت من النوم وحلم مقابلة الريس..
