جريدة الأهرام الجديد الكندية 
مقالات مشابهة
كشف أستاذ الجراحة الدكتور محمد فتوح عن خطورة حالة الناشط السياسى أحمد الخطيب بعد اصابته بمرض الليشمانيا الحشوية مؤكدا أنه مرض معدي ينتقل عن طريق ذبابة الرمل مشيرا الى أن العدوى انتقلت اليه وهو داخل السجن .
وحذر فتوح فى مقال له من عدم سرعة التحرك من قبل المسئولين للافراج عن الخطيب واجراء مسح شامل لكل العساكر والمسجونين مشيرا الى أن هذا الامر سيتسبب لمصر فى فضيحة عالمية وسيؤثر تأثيرا بالغا على السياحة والاقتصاد وساعتها سنعض أصابع الندم .
والى نص المقال
معلش هوا المرض ده مش في تخصصي المباشر كجراحه وكل المعلومات اللي هاقولها هنا يا إما من معلوماتي الشخصيه أو من قرايتي وبحثي عن المرض بعد قصة أحمد الخطيب
أولا :مرض أحمد الخطيب هوا الليشمانيا الحشويه Visceral Leishmaniasis وده مرض معدي بيتنقل عن طريق حشره اسمها ذبابة الرمل sandfly اللي هيا الدبانه الزرقا او الخضرا الغلسه اللي بتكون في الأماكن الصحراويه وتقعد تقرص قرصه خفيفه ورخمه قوي واكيد كلنا شوفناها ( يعني مش نادره ولا حاجه ) ودي صورتها وهيا بتنقل المرض اكتر من البهائم زي المعيز أو من انسان مصاب بالليشمانيا بصوره اقل .
اكتر الحالات المصابه بتتصاب بالليشمانيا الجلديه وده مرض غلس بيعمل زي قرحه وبعدين قشره وبعدين بيعمل تشوه في الجلد وصعب جدا الشفاء منه بس مابيموتش وموجود في المناطق البدائيه والصحراويه في الشرق الاوسط وفي الهند وموجود في شمال سينا في مصر وحسب منظمة الصحه العالميه كان فيه 860 حاله متسجلين ومتشخصين في شمال سينا في 2011 وزاادوا ل 1260 حاله في 2012 وده شكل الليشمانيا الجلديه.
فيه حالات نادره بيحصل فيها الليشمانيا الحشويه نتيجة اسباب متعدده زي ضعف
المناعه او انه اتقرص كتير وبيروح فيها المرض للاعضاء الداخليه زي الكبد والطحال والغدد الليمفاويه ونخاع العظام وبيأدي لنقص شديد في الوزن وتضخم في الكبد والطحال وانيميا وهزال وفقد شديد في الوزن مع ارتفاع في درجة الحراره وضعف شديد في المناعه بيأدي لعدوى متكرره ونسبة الوفاه فيه حوالى 95% في الحالات اللي مابتتعالجش في خلال من سنه لسنتين و50 % في الحالات اللي بتتعالج واسم المرض ده بالأنجليزي كالا أزار kala azar وهيا كلمه هنديه معناها الحمى السوداء لأنهم ماكانوش عارفينلها سبب ولأنها بتدي لون غامق او اسود لجلد الشخص المصاب وده شكل المريض بالليشمانيا الحشويه.
للأسف فيه نسبه من الحالات اللي بتتعالج من الليشمانيا الحشويه بيحصلها ليشمانيا جلديه بصوره شديده قوي بتعملهم تشوه شديد وممكن تتخيلوا صورة أحمد الخطيب دلوقتي وبعد مايخف ممكن يبقى زي كده.
طيب عشان لو حد قال ان احمد الخطيب كان عنده ليشمانيا قبل مايدخل السجن فترة حضانة المرض بتبقى من شهرين ل 4 شهور ولما تزيد قوي بتبقى من 6 ل 8 شهور غير ان الليشمانيا الحشويه بتموت في خلال سنه لسنتين لو ماتعالجتش يبقى اقصى وقت الشخص يتصاب فيه بالمرض لغاية لما يموت سنتين و8 شهور واللي اعرفه ان احمد الخطيب بقاله 3 سنين في السجن يبقى اكيد احمد الخطيب جاتله العدوى دي من السجن خصوصا ان السجون بيبقى فيها بهايم وظروفها البيئيه احنا كلنا عارفينها وتشجع على انتشار حشرة الsand fly وتكاثرها.
طيب ايه خطورة الموضوع ده غير طبعا خطورته على حياة أحمد الخطيب اولا احتمال انتشار العدوى بين السجناء والعاملين في السجن زي الجنود والظباط لأن الحشره مش هتقرص المسجون وتيجي عند الظابط تديله تمام وتدور نفسها مكتب
ثانيا : انتشار المرض في الأماكن السكنيه المحيطه بالسجون لأن زي ماحنا عارفين كل السجون في وسط مناطق سكنيه والحشره مش هتغلب مع سور السجن ولا هتخاف يضرب عليها نار وهيا طالعه من السجن ثالثا : منظمة الصحه العالميه بتتابع انتشار المرض بصوره دوريه وخصوصا في الأماكن الموبؤه ولو منظمة الصحه العالميه اعلنت ونشرت تحذير إن مصر من المناطق الموبؤه بالليشمانيا وحذرت من السفر ليها يبقى انسى خالص السياحه اللي هيا مش موجوده اصلا كام سنه قدام لأن في الحاله دي شركات السياحه مش هتعمل رحلات لمصر غير ان التأمين عالسياح هيزيد قوي و هيغلي سعر رحلة مصر والسياح مش هيحبوا ييجوا مصر لأن سعر الرحله غالي وكلهم بيحبوا يعملوا تأمين ع الرحله.
يعني المشكلة مش هتبقى أحمد الخطيب، بس وحلها مش عشانه لوحده، لكن للأسف كل المؤشرات بتقول إن النظام مش هيستجيب لدعوات الإفراج الصحي عن أحمد الخطيب أو عمل مسح شامل للمساجين، بسبب البوستات اللي على فيس بوك أو الهاشتاجات أو التريندات مع أهمية إستمرارها.
ولأن زي ماحنا كلنا عارفين النظام مايهموش صحة البني آدمين ولا المساجين طبعا وأنا متأكد كمان ان ماتفرقش معاه صحة الظباط والعساكر في السجون ببصلة، فكل الخوف إن ما يتمش تحرك إلا بعد ما نوصل لمرحلة الفضيحة العالمية، ويحصل ضغط من بره. وساعتها التمن هيكون غالي علينا كلنا.
