جريدة الأهرام الجديد الكندية مقالات مشابهة
بقلم السياسي جمال رشدي
فينك يا ولد العم هريدى انت وقناوي كنتم رجالة تقف على أشنابكم الصقور.. مكنتشوش ترضوا العيبة كانت كلمة الواحد فيكم توقف بلد.
كانت لكم مهابة. ورجولة ونخوة… لكن للأسف أولادكم شوية عيال كسفوا الصعيد أمس في الأقصر.. وكسفوا كل مصر…ايه الحكاية يا ولد العم هريدى وقناوى انتم كبرتم في السن ولا ايه تقريبا العيال مش عملالكم حساب وصوتكم مش بيخوفهم ذي زمان فين الشومة ياعم هريدي فين شنبك يا عم قناوي. ارجوكوا اتحركوا وادبوا شوية العيال وقلولهم أن عمهم حنا وعمهم جرجس كانوا بياكلوا معاكم في طبق واحد وكنتم بتناموا مع بعض على حصيرة واحدة . قولوا للعيال الجهلة أن محمد ابنكم كان بيحمي مريم بنتهم ويحافظ عليها وكان بيعمل ميت مصيبة مع أي حد غريب يعاكسها. ايه ال حصل يا ولد العم.. ليه العيال متعلموش منكم الحياة والأدب النخوة والرجولة. ليه الزمام فلت منكم. انا لابس الجلبية الفلاحي وجي ازوركم معايا شوية جدي في يدي وحاطط العباية الصعيدي علي كتفي. بس ارجوك يا عم هريدى انت وقناوي لا تحلف عليا بالطلاق اجلس عندك ضيافة اسبوع ذي زمان انا اطمئن عليكم وعلى صحتكم اجلس معاكم يومين متنساش الفطير المشلتت عسل النحل والجبنة القديمة. ولد العم هريدي انت وقناوي انتم فاكرين جربة القصب عاوزكم تاخدوني في الصباحية مع الشمسية علشان نفسي في القصب. كمان انا انام برة البيت على الدكة ذي زمان تحت الشجرة نشغل الراديو ونسمع ام كلثوم وهي بتغني عاوزنا نرجع ذي زمان قول للزمان ارجع يا زمان. بالمرة عاوزكم تجيبولي العيال ال عملوا الظيطه في العويسات علشان اتكلم معاهم واقولهم عيب يا اولاد انتم اولاد أصول وكرم وعلشان يجلسوا على الحصيرة معانا ويأكلوا لقمة… وعليم الله العيل ال الاقيه مش هيسمع الكلام أكسر دماغه.. عيب يا ولد العم هريدى انت وقناوي. الناس تاكل بوشنا عيش وتقول. هريدى وقناوي ملهمش لزمة ومش قادرين يربوا عيالهم.. انا جيلكم بلغوا جرجس وحنا هيكون العشا عندهم وكمان متنسوش ناخد الشيخ عبد الباسط ونروح نسلم على ابونا بنيامين علشان وحشني قوي وكمان ناخد بخاطره يمكن زعلان من ال حصل. ولد العم. انتظروني على المحطة انا ركبت القطر من المنيا فرطة كعب اكون عندكم…… سلام اخوكم عبد المتقال القناوي
