جريدة الأهرام الجديد الكندية مقالات مشابهة
بقلم السياسي جمال رشدي
حصل ايه يا شعب مصر .. كنا بنسيب باب البيت مفتوح الليل والنهار ليه بنقفله دالوقت بالسلاسل والقفول وتخاف من الاخ او العم ياحسن يدخل يشوف حاجة. حصل ايه يا شعب مصر كانت بنت الجيران اخت شباب الحته ولو حد غريب بره بص ليها كانت نخوة الرجولة تدافع عنها دالوقت لا مفيش الكلام دا .البصبصة شغالة والترامادول الله ينور حصل ايه يا شعب مصر كانت خالتي ام خلف وخالتي ام سعد لما تخبز العيش البتاوي تبعتلنا رصة عيش خدي يا ام جمال وكلي العيال لحد لما تخبزي دالوقت الفرن اتهد وعيش المخبز عليه خناقه.حصل ايه يا شعب مصر مكنش الواحد يقدر يولع السيجارة قدام أبوه او أخوه الكبير او عمه او خاله او أحد أفراد العائلة او حتي الغريب الكبير عنه دالوقت الكل بيخمس مع بعضه . حصل ايه يا شعب مصر أبويا كان بيبقي فرحان ومبسوط لما يعرف ان المدرس ضربني ووبخني علشان يعلمني الأدب والعلم دالوقت لا . المدرس بيحاول يتصاحب علي التلميذ علشان يتجنب شره هو وابوه. حصل ايه يا شعب مصر كانت تجمعنا مصطبي واحدة مع شاي العصرية دالوقت بتجمعنا قعدة المزاج ولفة السجارة وشمة البودرة. حصل ايه يا شعب مصر كان زمان المليان يكب علي الفاضي كانت فيه محبة وبساطة وعفوية كانت فيه اخلاق واحترام وادب كان فيه ذوق ورقي واحساس دالوقت لا. موجود سفالة وهمجية وصراخ وعويل وتصلف وقلة ذوق وعنهجية .. كان اسامينا واحد محدش يقدر يفرق بين مسلم ومسيحي كنا جمال ومدحت .سعد . عطا .سامي . خلف. عيسي .سيد .فتحي. علاء . دالوقت لا الدنيا اتشقلبت بنسمي اسماء غريبة عننا وعن مسامعنا .طيب ايه السبب واتغيرنا ليه وايه ال حصل . ليه الكل عاوز يأكل في بعضه ليه الواحد عاوز ينهش في أخوة . انا حزين وزعلان . حتي الطيب والخلوق نقول عليه ساذج. والكذاب والمنافق نقول عليه ذكي . لازم نغير المنهج التعليمي لازم نعد المدرس ونعطية صلاحية قوية لازم تكون هناك أحكام رادعة لازم نغير منظومة الإعلام . لازم نبدأ قبل ما الأمر يفلت من ايدينا . لسه فيه امل لسه فيه ناس كويسة هما قليلين لكن مؤثرين . لسه في شوية ادب لسة فيه شوية ذوق . لكن لازم نبدأ لازم نبدأ الحل في المنهج والمعلم والاعلام .
