جريدة الأهرام الجديد الكندية 
مقالات مشابهة
بقلم حبيب عبد النور
================
بينسى لما كان بيخاف ينزل الشارع يجيب عيش وجبنة !
بينسى لما كان أقصى فسحة ليه من المطبخ للصالون !
بينسى لما كان عمال يصوت ويقولك انزل يا سيسي !
بينسى لما كان النور بيتقطع عليه اكتر من ١٨ ساعة في اليوم والولاد بتذاكر على نور الكشافات والمحلات بضاعتها بتخسر !!
بينسى فرحته لما الدولة عملت محطات كهرباء دفعت تمنها مقدما ولما بتقول له يلا ادفع نصيبك عامل فيها أطرش واخرس !!!
بينسى فرحته لما سلمت الناس شقق محترمة يعيشوا فيها بدال مكان اهل العشوائيات قنبلة موقوته بتهدد كل واحد فينا !!
بينسى لما قلت لوحدي مش هقدر وقالوا لك كلنا معاك يا سيسي !!
بينسى فرحته بتسليح مصر وتقديمها للعالم قوة عسكرية لا يستهان بيها في العالم !
بينسى تكلفة الارهاب اللي حاميه وحامي ولاده في سينا بندفع فيه قد إيه فلوس ودم و أرواح شباب ميعوضهمش مال الدنيا !!!
الشعب بينسى سنين عايش فيها في فساد هو عارفه كويس جداً وبيشتكي منه ليل ونهار ولما تيجي تصلح يقعد يهلل ويقولك لا مقدرش !!!
بينسى لما بيقعد يتمنظر في شغله ولا في مكتبه ولا في الموصلات ويعمل نفسه أبو العريف ويقول الدولة مفروض تعمل كذا وكذا وتحارب الفساد اللي معشش بقاله سنين .. ويوم ما تنفذ .. يقعد نفس القعدة ويولول ويتمنظر تاني ويقول كلام عكس اللي كان لسه قايله في نفس ذات المكان من كام يوم !!
الشعب بينسى ان بلده منهوبه سنين لصالح رجال أعمال توحشوا ولما بتطالبهم بنصيب البلد في اللي عملوه يبتدوا يهاجموك في الإعلام بتاعهم ويسخنوا الناس عليك !!
الشعب بينسى ان الدعم اللي الدولة بتدفعه على البنزين والأكل بياخد منه الأغنياء اللي عايشين في الكومباوند ولما يزيد سعر سلعة تلاقي أول ناس يشتكوا هما نفس الأغنياء دول ويقولوا مش قادرين بمنتهى البجاحة !!
الشعب بينسى يا سيسي ان رئيس بقيمة وجبروت السادات خاف من إصلاحات ضرورية وفضلنا محلك سر سنين وسنين والأدراج بتتفتح والرشوة شغالة وكل واحد حاطط ايده في جيب التاني ويقول مصلحتي وبس !!
الشعب بينسى ان رئيس زي مبارك سلم البلد تسليم اهالي لشوية منتفعين داسوا على الشعب بالجزمة ومحدش منهم فكر الا في مليارات يجمعها على حساب أي حد واي حاجة وفضل ٣٠ سنة محاولش يقرب فيهم ناحية اقتصاد متهالك وفضل يستلف ويسدد فوايد وأصل الديون زي ماهو !!!
يا سيسي احنا مع بلدنا وأي إصلاح يشد عودها ويقويها احنا مش خايفين من حد ومش هنسيب بلدنا لشوية فتايين لا هما داريين بحاجة ولا فاهمين حاجة ومش وراهم إلا الشكوى وبس !
هو من إمتى كان في زيادة في أسعار بنزين ولا سلع ولا أي حاجة والناس فرحت يعني ؟؟؟
كله عايز يعيش بلاش الغني قبل الفقير .. شعبنا أتعود على الانتخة يا سيسي ويوم ما تقوله مينفعش .. يقولك لا معلش مقدرش اغير نمط حياتي !
الشعب ده اللي بيرمي أكل في الزبالة وبيستهلك كروت شحن في نميمة وحكايات فاضية ويتمنظر في كل وأي حاجة ويقولك نفسي ابقى زي بلاد بره وهو لو راح بلاد بره دي هيدفع تمن البنزين كامل وهيدفع ضرايب تقسم وسطه ومش هيلاقي وقت يقعد على قهوة ينتقد .. ده ما بيعملش هنا اكتر من انه ينتقد وبس .. وبس والله !!!!
تقوله يا اخي نستحمل عشان بلدك وولادك يبتدي يتفزلك ويطلع علينا بأفكار لوذعية ولا هو داري باللي بيحصل في العالم كله ولا حاسس ان بلدنا في مرحلة صعبة وبيتاخد فيها قرارت وإصلاحات صعبة عشان تتبني على نضافة !!
