جريدة الأهرام الجديد الكندية 
مقالات مشابهة
تسامحيني….
علي سهري ف طول ليلي
وسرحاني طول الوقت ف سنيني
بدور وسط كل الناس
علي ضيّك
علشان ألقي ف يوم زيك
وملقتهاش
تسامحيني….
بإني قابلت ياما بنات
وكان بينا كتير حكايات
قصص ،روايات
وشات لساعات
كلام فاضي فأي حاجات
هقولك كل شئ بالذات
علشان ناوي اكون ليكي
وتكمل دنيتي بيكي
هاكون لك أب ف عنيكي
وطفل روحه ف ايديكي
واغنيكي
ف كل قصايده هذا الوقت
بعيشك دنيا جوايا
بتوبة عايشة انا معايا
بتتنفس هوا ريحك
ونفسي تفهمني منايا
هاموت لو هابقي انا جريحك
تواعديني…
بقعدة جوه قلب كافيه
بدون ماتقولي ليا انا ليه
ونحكي كلام يكون بالخير
وتفهمي إن جايلك خير
وفارد ليكي دراعاتي
ونفسي تكوني ف حياتي
تساعديني
اسمع صوت يرد آمين
ف كل صلاة وف التسليم
تساعديني….
ارتب تاني افكاري
وأقولك كل اخباري
اكون منك وأمنّلك
وابصلك بكل غرور
بدونك قلبي كان مهجور
بحلم كل يوم بالنور
بقولك ….
اوعي تمشي ف يوم
نزعتك بين غيوم بالكوم
ورسمتك علي الورق مطرة
بحبك من زمام جدا ومن فترة
بقولِك ……..
هاكون لك قد ما هاكون
وكل الصعب ليكي يهون
بحبك انا جدا وبجنون
هاكون لك أب طبعه حنون
يا دعوة امي وقت الليل
يكون لك يابني حد دليل
يصون روحك
وف جروحك يكون لك خير
هعيشك فرحة واعمل شير
لكل الدنيا اصلك خير
يا فرحة وجاتلي علي فجأة
يا ضحكه جوا حضن الليل
عليكي بغير
مانا لو كنت باعرف أطير
لكتبوا فحبنا أساطير
عن شاعر عشق بجنون
مدقش ف لحظة حتي النوم
ولو يسهي عليه وينام
يشوفك جايه فالأحلام
يا حضن أمان
يا شوق وحنان
يا ام بطعم حبيبه
يا ارض وكلها طيبه
مابيزرهاش ولا جرح ولا خيانه
ياطفلة حلوة وجريئه
وياعيون صافيه وبريئه
مفيش فالدنيا زيك حد
يا ضحكايه وعايشه بجد
وهاعمل ايه!!!!
وما فاليد من حيله
سوي إني اكتبك اشعار
وجوا قصايدي ارسم دار
تعيش فيه أبد الدهر
كلمات :د/ عبدالرحمن السموري
