جريدة الأهرام الجديد الكندية 
مقالات مشابهة
طرح احد المغتربين المصريين بالسعودية ويدعى تامر عوض عدد من الأفكار البسيطة لجلب ملايين الدولارات لمصر من المصريين بالخارج نضعها أمامكم كما كتبه بدون تدخل منا .
عايز تأخد فلوس من المغتربين ؟؟ وتخليهم ييجوا جري كمان يرسلوها لحد عندك ؟؟
أقولك أنا تعمل أيه …
حضرتك تقوم عامل صندوق اسمه مغتربي_مصر مثلا واشتراك سنوي ١٠٠٠ دولار مش ١٠٠ مقابل ان المغترب لما يرجع مصر يكون ليه معاش وتأمين صحي…… هندفع
اعمل صندوق اسكان_مغتربي_مصر واطرح مشاريع إسكان وشقق ( بس مش ب ٢ و ٣ مليون زي اللي أتعمل قبل كده ) وأطرحه للمغتربين بالتقسيط ، وبالدولار …. هندفع.
اعمل مشاريع استثمارية للمغتربين تضمن لهم ان اللي يرجع منهم وهو لِسَّه في سن عمل يلاقي شغلانة يشتغلها ويعيش منها … واعمل اكتتاب لتمويل المشاريع دي … هندفع
اعمل مستشفيات مخصصة للمغتربين وأسرهم يتم تمويلها بالدولار من المغتربين مقابل عضوية تسمح لهم بتلقي العلاج في المستشفيات دي لما يرجعوا ….. هندفع
وصدقوني هتلاقي المغترب اللي عايش همه هيشتغل ايه لما يرجع وهيأكل ويشرب منين وهيتعالج ازاي ساعتها بيقطع من قوته وأكله وشربه عشان يدفع فلوس عارف ان ليها مردود عليه وعلى أولاده مقابل عمره وصحته اللي بتضيع بره بلده …. وفعلا التحويلات هتفرق وبالذات لما حاجة من الحاجات دي تتنفذ والناس تشوفها وتصدق الحكومة والنظام وأنها مش فهلوة و”شخلل يا بلدينا عشان تعدي”
وساعتها كله هيطلع كسبان … البلد ، والمغترب ، والناس اللي هتشتغل في المشاريع دي داخل مصر والشركات اللي هتبنيها والموظفين اللي حيقوموا بإدارتها.. إنما فكرة ما تيجي آخد منك فلوس عشان انت مغترب ….. مش هتمشي.
المغترب لم يجد من يحنو عليه والله
