جريدة الأهرام الجديد الكندية 
مقالات مشابهة
بصى اتجوزى اللى يحسسسك انك ملكة
بصى اتجوزى اللى يحسسك انك بنته
بصى اتجوزى اللى يحسسك انك اخته وامه وخالتوه وعمته كمان
بصى اتجوزى اللى يجيبلك الفطار فى السرير
بصى اتجوزى اللى كل يوم يجيبلك ورد
بصى اتجوزى اللى كل يوم يجيبلك شيكولاته
بصى اتجوزى اللى يعملك كل يوم مفاجأة ويطفى النور ويولعه مره واحده
مش عارف مفاجأة ازاى وهى كل يوم مثلاً ؟؟!!!!!
بصى اتجوزى اللى فى عيد ميلادك وجوازك واول يوم عينك جات فى عينه واول يوم اتكلمتوا فيه
وتاريخ حصولك على الشهاده الابتدائيه والاعداديه والثانويه وما يليها على هديه فخمه او حتى يسفرك باريس مثلاً
بصى اتجوزى اللى لو فى يوم غلط وزعلك ( قلك هاتيلى كوباية مياه ) مثلاً انه يجيب ورد وبالونات هيليوم وفرقة حسب الله ويقف يصالحك تحت البيت
يا ولاد اللذينا ده هنجيبه منين ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
عارفين تجيبه منين انا اقولكم عارفين مسرحية ( الهمجى ) فى فصل فى المسرحية غيروا عقل ادم ( الفنان / محمد صبحى ) بعقل الكترونى
زى الفلتر مش ممكن يعمل حاجة غلط ابدااااااً بل بالعكس بيعمل كل حاجة بمثالية مطلقة ولكن بدون روح وبدون حياة انه الآلة …………….
ياجماعة حرام عليكم …………
كفاية رسم مثاليات واوهام للبنت تخليها تعتقد ان الحياة الزوجية جنة مغلقة وغير كده مينفعش
يعنى مفيش زعل ولا مشاكل ولا اى خلاف الكلام ده مش واقعى ومش بيحصل لازم هما الاتنين يستحملوا عيوب بعض احنا مش ملايكه احنا بشر اى علاقة حتى ولو صداقه قويه بيمر عليهم لحظات خلاف عادى يعنى الدنيا مش هتقف عادى يوم ولا اتنين ويرجعوا حبايب تانى الحياة الزوجية فيها حقوق وبرضه فيها مسئوليات ووجبات فيه مشاكل بتجابهنا لكن شوية صبر مع احتمال مع حب تعدى ولكن الاوهام والفارس الابيض والملاك اللى نازل من السما اللى مابيغلطش احب ابشركم واقولكم بامانه مش موجود . ……………………….
نبيل هانى يوسف
