جريدة الأهرام الجديد الكندية مقالات مشابهة
مين اللي ضحك على مين وقاله : إن الخلاف لا يفسد للود قضية ؟؟؟ مع إنه حدانا بيولع القضية ويحصل فيه ضرب نار يمكن يجى من أول عشية لغاية الصبحية , يكونش اللي قال الحديت دا كان في باله بلاد أمريكا ولا حتى الدول الأسكندنافية !!! دي ناس أتربت على ثقافة الخلاف والاختلاف وطلعت لقت حالها كدا وعشان كدا أتقدمت وإحنا حالنا مال وبقى كدا وكدا , يعنى تلاقى الواحد منهم عاوزك بالعافية تقوله نورتنا مع إن كلامه مالوش عازة وفى بالك تقول ياريتك من ساعة فارقتنا , الكلام بارد والحديت ماسخ ومش بعيد أخر الجلسة تقلب بعركة ويتقلب المثل وتبقى ما عداوة إلا بعد محبة ويظهر الوش التانى , اومال كل واحد يقولك أنا دماغي عجبانى أو يطلع حظك زين ويقول عليك انك هربان من السرايا الصفرا , ويا سلام لما الخلاف يدخل تانى يوم الصبحية من باب المصلحة أو المدرسة وتبقى ظهرية , أو يزيد الجنان ويمسك الواد عليوة ود بتاع الخلاف ويضربه بكف ولا اتنين ويورم له الخدين وتبقى الخيبة خيبتين , قوم يطلع الخلاف بعد ما كبر وذاد تانى برا المدرسة وتشبك فيها العيلتين وهاتك ضرب بالبارود قول ولا يكفيهم يومين , ومش بعيد يوقع فيها قتيل ويكون ولد مليح وزين , وتشبك نار التار بعد ما كان طفوها بسبب قصبتين في غيط ولا اتنين , ولا في الزرع حوضين أكلت منهم جاموسة مخيمر من زرع أبو حسين هبشت لها من الدرة كوزين , ومع إن الكل يقولك عليهم ناس كٌمل وعليهم العين لكن ساعة الخلاف تحمر العينين ويروح فيها قبل العفش الزين , فيه عالم فاكرة إنها بس لوحدها اللي فاهمة مع إن الموضوع دا مافهوش متعلم ولا غير , يمكن تلاقيه على الهواء في برنامج وهاتك كلام يا عين يا ليل مع اللي معاه مخالف ومش بعيد يتهمه بأنه مع العفاريت متحالف , ويقولك شايفين الكلام مش تمام وسكته مخالف ويا سلام لو كان أستاذ كبير, وعلى يده الطلبة بتتعلم وتتخرج يبقى فيه بينه وبين زميله كلمتين فيهم بيشعر بحرج تتنسى فورا الشهادات والزمالة وتلاقيه جات له حالة , وخرج عن شعوره ويقول : أنا مش شايف قدامى رجالة , يغور الكل في داهية أهم حاجة عندي مكانتي وماعدتش مستاهلة , وكيف الواد في السيكشن يرد على , طيب وحياة أبوك اللي نسى يربيك مش هتشوف نجاح السنة دية ولا اللي جاية , يا عمنا دا أنت اللي المفروض لو اتفرقنا تلمنا وثقافة الاختلاف تعلمنا , مش فينا تفرق وكل محاضرة تشخط وتزعق علمنا ازاى مع بعض نختلف لكن في الشدة تبان المعادن وتتعرف , الحوار يا سادة مش غالب ولا مغلوب بالعكس دا فكر وفيه لازم الخلافات والصراعات تبعد وتذوب , دا كل واحد فينا له بصمة عن التانى تختلف ولو كان فيه غلط مش عيب نرجع ونعترف مش هيقلل من الكرامة حتى لو اعتذرنا بدل المرة ألف , لو كل واحد مش هقول يبص حواليه لا دا كفاية يتطلع لأصابع يديه هيلاقيهم مش الكل واحد لكنهم مع بعضهم يد تتعاون وتحن ولا فيه يوم صوباع طول على أخوه واتجن , سيب بكرا لوحده يبين اللي كان صح واللي كان كلامه سخيف مع الأيام هيتبخر وبح , خلينا من النهاردة نقول : من حقك تختلف وحقي عليك بي تعترف .
جرجس ثروت
عضواتحاد كتاب مصر
