جريدة الأهرام الجديد الكندية مقالات مشابهة
بقلم : جرجس ثروت
فيه ناس شاغلة بالها قوى إذا كان البوس اللي في السينما حقيقى !!! وسايبين أمور كتير قوى محتاجة تفكيرهم وملاحظتهم القوية , ولكن الخيبة قوية وقالوها زمان ما يضحك شرالبلية , والمشكلة مش في البوس لكن في البؤس اللي إحنا عايشينه , وياريت كنا نسيب الممثلة تتباس ولا حتى تولع يا ناس , وكل واحد من السائلين يتعلم منهم البوس ويقدر يجى على نفسه ويتغصب ويعمل منه الواجب واحدة ولا اتنين يبيض بيها وشه قدام أم العيال اللي مش طايق يبص في خلقتها ولا هي طايقة نفسها معاه ولا خلفتها , واهي تتحسب له بدل الحال اللي معاهم مال , بوسة قليلة تمنع بلاوى كتيرة ويمكن تهدى السر وتسيب غيرك في حاله يبوس ولا يدهسه اتوبيس , وافتكرت لما التفكير يشح حتى فنانين السينما العالمية يسألوهم بخيابة , عالم اتخصص في انه بيجى في الفارغة وعلى رأى المثل قاله : يا بوى علمنا الهيافة , قاله : تعال في الفارغة واتصدر , ويسيبوا الصح ويمسكوا في الكدب وخد عندك من دول كتير , زى موظف في بنك رايح له مواطن غلبان عاوز قرض يستر بيه البت أو يبنى البيت عشان يستره من البرد , وعشان شكله على قده هاتك يا ضمانات وورق ويشبعوه طلبات ويقرفوه توقيعات ولغاية ما يصرف القرشين إما يكون أتشل أو مات , في حين إن الباشا اللي استقبلوه بمكتب المدير وشربوا معاه القهوة وقدم ورق قالوا له : برضوا سعادتك الناس بتبان ولا حتى للورق نحتاج , وهبش بسلامته البنك بالملايين وخلع , وحداك بنك القرية في المحروسة بطولها وعرضها مين أكله ونفضه غيرالمرتاحين واللي على وشوشهم الخير يبان , وحكاية يبان على الوش دى ليها اصل بيسموه بتوع علم النفس خطأ الهالة , بالبلدي كدا الوش الصابح المريح حواليه هالة وهيبة تطمن حتى لو من جوا فيه العبر وبتيجى ألف حالة , والناس بقت بتاخد بالوشوش وياما فيها الكتير مغشوش , بيقع فيها المدرس لما يحب الولد والبنت الشيك ويقعدهم قدام ويحتقر واحد تانى مظهره على قده ويمكن يكون اشطر وأفضل ويخليه اخر الفصل , وعندك على الطريق فيه كمين يفتش سيارات الأجرة ويطلع العين ودا مطلوب وزين , ولكن تيجى عربية الباشا وعلطول ومن غير تفتيش تعدى , ويا عالم فيها إيه ؟ وهو باشا صٌح ولا بايش ومن القانون متهرب ويمكن سايقها ولد طايش , وفيها إيه لما الباشا يتسأل ويطلع الكارنيه ويساعد سيادته الملازم ومعاه الأمين يكون في تطبيق القانون أمين , إذا كان باشا صٌح التفتيش ليه شرف ويبطل يبص للي بيعمل شغله بقرف , اللي واقف وسط الجبل في الطل في الشتا وبالصيف في القيالة وسايب مرته وعياله هو اللي بيحمى الباشا وفلوسه لازم نرفعه فوق الكتاف مش ندوسه , وعندك واحد موظف روتينى بيشتغل في مصلحة وموظفينه يعطل صرف فلوس ناس ويقولك عاوز أشوف اصل القرار وهو عارف أنه زميله الموظف ما يقدرش يجيبه , ولكن الفن في المصالح بقى ازاى تذل غيرك ومية مرة لمكتبك تجيبه , مع إن عنده مكاتيب من الشئون القانونية تفيد القضية , وهى حتة ورقة ممضية هيتصرف بيها كام ملطوش اتخصم ظلم وأذية , ولا ينساك عدى على الطلب قبله كام توقيع من كذا موظف اطلع قبله على القرار والموضوع كله يكون رفع جزاء في يوم عارضة قال إيه : بدون إذن مسبق , في الوقت اللي فيه موظفين بالكوم لشغلهم مش رايحين وعليهم مطرمخين , خليكم بقى في البوسة وتفضلوا في الحوسة والبركة فيكم ضيعتم المحروسة !!!
