بالعامية المصرية
بقلم : ميلاد موريس
اصله ساكت زي عَادته
كل مرة اقوله مالك؟
يجي ويتعصب يقولي
خليك في حالك!!
ماهو انت حالي ازاي
عايزني اسيب مشاعري
تحضُن مشَاعرك و ف يوم
ماباجي اسالك تقوم وتجري
ماهو لسة بدري!!
خليك واحكي كل حاجة
فضفض وطلع كل هم بيشغلك
اياك ف يوم تكتم مشاعرك
كتم المشاعر ممكن اصلاً يقتلك
اياك تعيش مكتوم وساكت
خبي اللي عايزه بس احكي
ضرب القلم ساعات يِعَلم
بس اوعي ف مرة تبكي
مانا اصلي برضه زمان بكيت
كانت دموعي يوم ما تنزل
متتمسحش
كنت بتمني ساعتها اكون
قوي ولسة ناري منطفتش
كنت ناوي ادي دروس
للي ياما كتير رموني
بس برضه قولت لأ
هايجي يوم ويوحشوني
لسة قلبي مش ناسيهم
ما هما برضه علموني
![](https://www.ahram-canada.com/wp-content/uploads/2016/08/4-22-458x330.jpg)