جريدة الأهرام الجديد الكندية 
مقالات مشابهة
بقلم المهندس / نادر صبحي سليمان
فى احد المرات البابا كيرلس نزل يصلى عشيه فى البطرخانه وقبل دخوله الهيكل خلع حذاء قدمه بجوار المنجلية ودخل المذبح فى 2 شمامسه شباب شاهدوا حذاء البابا فوجده قديم جدا ، راح واحد منهم شايف يا فلان بقى البابا يلبس جزمه كده تعال ناخدها نشيلها ونجيب له مكانها جزمة جديدة بسرعة ، بالفعل أخذو الجزمة وراحو جابو له جزمة جديدة
البابا كيرلس وهو نازل يبخر الكنيسة راح عدى على الشابين دول مسكهم من ودنهم تعال ياد أنت وهو اشمعنى بصيت لجزمة البطريرك ومبصتش لجزمة المعلم الضرير يابنى روحو بدلو الجزمة وجيبو جزمه للمعلم هو أولى منى لأنه بيمشى فى الطين والزلط ، لكن أنا بركب العربية وانزل أصلى هو أولى منى بيها وفعلا أمرهم يبدلوها ويجيبو للمعلم ولبس نفس جزمته القديمة
مرة تلميذ البابا كيرلس أبونا روفائيل دخل القلاية بتاعت البابا كيرلس خبط واستاذن ودخل سلام يا سيدنا سلام
يا ابنى بيبص أبونا روفائيل وجد البابا ماسك الشراب بتاعه بيخيطة لأنه اتقطع راح أبونا روفائيل يا سيدنا احنا نجيب لك دستة شرابات ليه بتعمل كده ، راح البابا كيرلس بصله قاله بس يا ابنى الفقراء والمحتاجين أولى بكل جنية وأنا فى الأول والآخر راهب اخترت الفقر بإرادتى واياك تحكى اللى شفته لاى شخص الا بعد نياحتى
البابا كيرلس كان فيه طبع اى حد يجيب له هدايا أكل أو فاكهة لازم الأكل اللى يجى يدى منه الفراشين والعمال زيه زيهم وممكن يديلهم نصيبه كمان ولا ياكل هو ، كان رجل يحب الفقراء وأطلق عليه أبو الغلابة.
ربنا يدينا قلب حساس زى قلب البابا كيرلس .
بركة صلواته تكون مع جميعنا أمين.
