كلنا وشربنا.. وكمان ضحكنا
كل حاجة ليها طعم.. كل حاجة ليها ريحة
خدتي بالك؟!
…. ّ المغرب أدن ـ أيوه.. أنا خدت بالي
وكل عيون الناس فرحانة
خدتي بالك؟!
ـ أيوه خدت بالي
أنا فرحان وياكي
ّ ـومش عارف أحزاني.. راحت على فين؟!
أيام وأيام وأنا زعلان..
وبحلم حلم طويل
ـ فتاح يا عليم.. رزاق يا كريم
كتر خير السرير
صاحي نايم نفس الحلم
كتر خيرك يا مرايتي..
متحملة حزني
أنا مش متحمل بصة..
عاوز أرجع لملامحي
صافي مصفي
زي النخل
اللي طارح في جنينتي
ـ اللي قدامك ما يفوتك
واللي وراك ما يجيبك
دعوة أمك يمكن تتحقق
لكن لو وصل النور لقليبك
ـ حبا حبا.. واللي ييجي قدام
حبا حبا واللي ييجي قدام
خطيت العتبة وجيتلك طاير
دلوقتي أحلامي بقى فيها عيال وبيوت
وفيها النور داير ما يدور
حوالين عنيك لما تهلى
ّ وأنا بتكحل من نظرة عينك
ّ وأنا بتشكل جواكي جنين
يكبر حضنك أرجع عيل
ويمكن أصغر من عيل
ّ
وكواكب يوسف طالعين في سماكي
ساجدين شاهدين على حبك وجمالك
يا جمالك لما ياروحي تفيضي في قلبي
ويضوي حبك في عيوني…
يا دلالك لما يا بت تحني عليا بضحكة
وترمي شباكك على قلبي وأنا مستسلم
ّ ـ خلي بالك كل كلامك حلو
وبينمل في وريدي
أبوس خدودك وابوس البسمة الطايرة
عليها في الحال
ـ إنت شاعر؟!
مش حخبي حبي ليكي
حبي ليكي كل صبح
وكل ليل لو إنتي جنبي أو بعيدة
طاب نام في حضني بس حضني
إوعاك تباعد بين قلبك وقلبي
مستحيل وده يرضي مين؟
تكوني أو أكون بس غنوة
ناصر النوبي
![](https://www.ahram-canada.com/wp-content/uploads/2016/06/3-7-320x330.jpg)
ناصر النوبى