ما تستغربوش .. أنا اللي عملت الفنكوش !!!
6 مايو، 2016 مقالات واراء
بقلم : جرجس ثروت
فين أيام اليوسفى أفندم لما كان يتقشر لوحده مش زى الأيام دي بقت قشرته لازقة فيه زى البطاطس !!! فين لما كانوا بيغنوا له : يا حلاوتك يا ستفندى يا بن عم البرتقان يا حلاوتك وأنت طارح في الجنينة في الأوان , كل شئ أتقلب وعلى الوش التانى قلب وكله بان , والكل بيلعب على اللي بيه يغلب وبقى الجنيه أعلى من الكارنيه , لكن يفضل شوية تعزى نفسها وتقولك : عمرالفلوس ما تعمل بنى آدم , والمتعزى دا تلاقيه في العيادة يقعد لأخرالنهار ويجى بسلامته يكشف في الحال ولا مستعجل , ويدخل لأنه دفع ضعف التذكرة ويعدى على دور الغلابة وتبقى مسخرة , وهنا يفتكر صاحبي بتاع الأمثال أن الفلوس عملت من اللي كان ما يسواش بطل ومش بعيد يتنحت له في كل ميدان تمثال , وكان لازم أرد له الأمثال بتاعته في وشه وأقوله : يا صاحبي دا كلام بنصبر بيه روحنا بعد ما الفقر دوخنا , حب الفلوس تحبك وما تصرفهاش تضمن تبقى في عبك , زمان كانت البقالة بياكل منها الكل وبنفس الشكل والحالة , والفول حبيب الملايين يصبح على المصريين قبل ما يبقى فيه خضار اورجانيك لناس وفاكهة جاية من برا لناس , والغلبان يحط في الثلاجة الخيار الصغير الصبح يلاقيه بقى حجم عائلي وينفع يتخلل ولو اتهور وجاب بطيخة وتحت الكنبة سابها ليلة والتانية يجى يطلعها يلاقيها كبرت وعليت من الكيماوي حتى على الخضار بقى مرشوش , ومن ساعتها وما فيش شارع مافهوش حد مسرطن ولا شاب واتنين في اللحد سكن والطماطم والفاكهة بقت تطيب في الأقفاص بدل العروش , ووسعت كروش ومن النهب والسلب في طمع الدنيا ما بيشبعوش , ولا مال ولا رمال تملأ العين وفى الموت ما بيفكروش وتلاقيه هونفسه يقولك ومين دايم عليها والكفن حتى جيوب مافهوش , وبعد ما يسيبك تلاقيه يهبش من هنا ومن هنا ويبيع لك الفنكوش , وفى ذات نفس الوقت تلاقى على نياته افندى يقولك : الناس جرالها إيه ؟؟؟ فين الأخلاق يا ست أنت ولا أنت يا بيه !!! ويفضل بشفايفه يمصمص وبعدها على بت الجيران اللي في ثانوي راجعة من الدرس يبصبص , وهاتك كلام في كلام مع إن الموضوع حسمته كل بلاد العالم وقفلته , مش هنسيب كل واحد لضميره طيب النهاردة راجل عال وبكرا اتغير الحال واتشقلب الضمير واللي كان فوق بقى في الحضيض يا خال , بلاد الخلق فيها قانون على الكل يتطبق ومهما كان منصبه إذا مسكوه في فساد من رقبته يتعلق , وعشان كدا الحال على سنجه عشرة والحكاية دي مش هيتضر فيها المحترم ولا اللي بيصون العشرة , لكن القانون يضبط الإيقاع ويخلى الوفي فوق وينزل بالخسيس للقاع , دا لو كانت فيه النية عشان نتقدم وننتج صبح وعشية , ولو كانت مشاكل الخلق تتحل بالكلام الحلو كانوا عملوا من القصايد دستور وعمروا لهم الصحراء بكام غنوة وعملولها جناين وسور , وإحنا الغلابة مش هنطلب البقالة المستوردة ولا نطمع حتى في البيتزا بالماشروم ولا حتى نصيف في شرم , لكن بلاش تدونا الوكل المسرطن لحسن يطلع عليكم الميتين بالحيا جثث سكنها المرض واستوطن ودول بالملايين , وكدا كدا أموات ويصرخوا زى الجبار ما صرخ زمان وقال : علينا وعلى أعدائنا , وساعتها هيروح الأخضر مع اليابس وتبقى جنت على نفسها براقش !!!
جريدة الأهرام الجديد الكندية 
