جريدة الأهرام الجديد الكندية 
مقالات مشابهة
بقلم / بولا وجيه
من كام يوم واحد من الناس اللي بحب ارادتهم وعزيمتهم وحبهم للحياة جداَ أتعرض لمشكلة، في الوقت اللي كان في ناس عاوزة تنزل الشارع تعترض علي موضوع الجزيرتين بتوع تيران وصنافير.
الشخص ده هو محمد أبو طالب واللي يعتبر واحد من الشخصيات اللي تحب تلاقي ناس كتير زيه في الدنيا كده علشان يحسسوك أن مفيش مستحيل وأنك لو فاكر أن المستحيل موجود فهو موجود لأنك أنت اللي وجدته.
محمد أبو طالب من الناس اللي مبتحبش أي حد يساعدها في حركتها فبيستخدم العصاية البيضاء اللي بتعوضه عن بصره؛ المهم أنه اليوم اللي الناس قالوا هينزلوا يعترضوا فيه علي موضوع الجزيرتين قال اكيد الجو هيبقي رايق والناس كلها هتخاف هنزل اتمشي شوية فاستخدم عكازه ومشي لحد ما حصلت المشكلة اللي كانت مع الشرطة حسب كلامه واللي كان أتكلم عنها كاملةَ في بوست – post علي الفيس بوك.
الغريبة أو اللي شدني تعليقاتنا كمصريين علي بتاعه؛ اللي يقوله يا سلام عاوز تقنعني أنك “….” وعارف تكتب كل ده؟! أو ا*ا نقط برضه وكاتب كل ده؟! ده أنا مفتح ومش عارف أقرأ كل ده!!
وكلام كتير من هذا المجمل اللي ممكن يخلي أي حد يندم علي وجوده في الحياة؛ علي فكرة هو مكانش طلب منك تقرأ البوست اللي كان كاتبه! ،أو حتي أتحايل عليك علشان تقرأه.
المدهش أكتر في الموضوع أن تاني يوم للحادثة دي كتب بوست برضه علي الفيس بوك بيقول أن الشرطة أعتذرتله يعني ببساطة الراجل لو كان كداب مكانوش هيكلفوا نفسهم حتي ويسألوا فيه!.
ثم أيه المدهش في أنه يكون ربنا أخد منه نعمة البصر بس قادر يعيش زي ما حضرتك قادر تعيش؟! ،أنا في يوم من الأيام كنت محروم من المشي وكان صاحبي الكرسي المتحرك أو السرير بس الصراحة مكنتش شايفه أعاقة ليا بالعكس ده كان أحد أهم الحاجات اللي ساعدتني أني أنجح وأحقق كل اللي نفسي فيه.
ياريت متظنش دايماً السئ في اللي حواليك وأفترض دايماً حسن الظن بيهم وصدقني الكلام بيبقي عامل زي الشيكولاتة حاول تطلع شيكولاتة بالبندق (كلام حلو) لو عاوز فعلاً تسيب أثر طيب وبلاش الشيكولاتة بالصراصير (الكلام اللي مش قد كده) لو أنت متحبش حد يأكلهالك (يسمعهولك).
وصدقني أبو طالب أو أي حد ربنا خد منه أي حاسة أو أي حاجة مهمة في جسمه ده في حد ذاته دليل علي أنه مميز جداً وأن ربنا شاف أنه يقدر يعيش من غيرها وأنه قوي وأنه مش هقول أنه يقدر يستغني عنها بس أكيد يقدر يتكيف مع الحياة حتي وهي مش موجودة.
بجد بعتذرلك يا أبو طالب عن أي كلمة زعلتك وصدقني نفسي كل الناس تتعلم منك أن المستحيل موجود جوانا بس لو حبينا فعلاً نتغلب عليه هنقدر بس أحنا نعوز ده ونحاول نشتغل علي التغلب عليه.
paulawagih@live.com
