جريدة الأهرام الجديد الكندية 
مقالات مشابهة
بطلوا كلمة “يتيم” والله الكلمة دي مؤلمة نفسيا عند اي حد فقد والده او والدته..يمكن انا ماحستش الاحساس دا و اهلي موجودين الحمدلله بس انا شوفت اصحابي كانوا بيتأذوا نفسيا ازاي من الكلمة دي..وفاكرهم لما بيسمعوا الكلمة دي اد ايه بيتجرحوا من غير مايبينوا …عينيهم كانت فاضحة وجعهم اوي مع اني كنت عيل مابفهمش
كانوا بيكرهوا اليوم دا اصلا..و بيكرهوا ييجوا المدرسة ف اليوم دا اللي بيسموه “حفلة”!!!
وكانت تيجي ست بشعة ف الفصل تقول بكل سماجة
“مين هنا باباه ميت”!!!
دي كانت المفروض يحاكموها والله بتهمة تعذيب بني ادم
متحسسش اي حد فقد اهله بإنه عنده نقص أو انه معيوب عن التانيين ، خصوصا الاطفال
انا واثق ان الكلمة دي بتقطعهم…
متروحش اول جمعة في ابريل تجمع اطفال وتلعب معاهم بمناسبة انهم “ايتام”!!
ايه المناسبة ف كدا…ايه الفكرة انك محدد يوم ف السنة تفكرهم فيه انهم من غير اب و ام!!
متجيش تتصور مع طفل وانت بتضحك وبتلعب معاه وهو من جواه بيموت عشان بس تنزلها ع الفيسبوك وتكتب يوم اليتيم او فرح الاطفال او اي هاشتاج مثالي من مثاليات اليومين دول
عارفين ياعم انك حد سوشيابل و بتحب الخير وعايز تعرف الناس أد ايه انت حنين…بس مش علي حساب نفسية طفل بيتهد من جواه وفاكر كدا انك بتفرحه عشان بيضحك قدامك…
بكل صراحة انتوا مش بتحتفلوا بيهم…انتوا بتحفلوا عليهم!!
لاني مش فاهم فين الاحتفال اصلا ان واحد باباه او مامته اتوفوا!!
كفاية جرايم وتشويه نفسيات بني ادمين تحت مسميات شيك و مثالية
كفاية استخدام البني ادمين كآداة عشان تبين انك حد حلو و جميل!!
خلونا نحس ببعض احسن مانحتفل ببعض
وحتي البوست دا…انا اسف جدا لو هيضايق حد
او ييجي علي وجع حد
بس فعلا الموضوع استفذني جدا و ماحلتيش غير الكتابة اللي بعبر بيها …يارب تجيب نتيجة و الناس تبطل المناسبة دي
#ضد_يوم_اليتيم
#كفاية_وجع_ف_الناس
